Dili – Festa Gratidaun Inspetoriál iha tinan ne’e monu iha 7 Setembru 2019. Membru sira husi Komuidade Edukativa 10, menus komunidade tolu iha Indonesia, halibur hamutuk atu agradese ho modu espesiál ba Ir Alma Castagna, inspetora Provínsia FMA Timor-Indoensia ba ninia animasaun no governu iha tinan ida-ne’e.

Komunidade edukativa ida-idak iha tinan ida-ne’e, hodi reflete kona-ba “Santidade ba ó mós” (Estréia Reitór-Mor) nian, haklea’an kona-ba Santu/beatu ka Venerável ida, no, hodi foti inspirasaun husi sira halo “jestu profétiku” ida hodi nune’e moris tuir iha “ohin” modelu ida-ne’e nia ezemplu.

Ema santu/beatu/venerável sira-ne’e mak Mamá Margarida, Oratorianu na’in lima husi Polandia, Jose Kowalski, Chiara Luce, Alberto Marvelli, Carlo Acutis, Tarcísio, Maria Romero, Zeferino Namuncurá, Maria Goretti, nst. Santu sira-ne’e mak sai aprezentasaun durante konvíviu.

Jestu profétiku sira ne’e ita halo ba foin-sa’e sira, tanba sira mak “Ohin Maromak nian” (kf Christus vivit). Nune’e pasajen evanjélika ba festa mak “Foin-sa’e, ha’u dehan ba ó, hamri’ik bá!” (Lc  7,11-14).

Missa agradesimentu halo iha Salaun Escola Maria Auxiliadora, ho Amu-Bispu Virgílio SDB nu’udar selebrante. Liturjia foti husi Natividade Na’i-Feto nian. Iha omilia Amu-Bispu dehan ita agradese “tanba esperiénsia ida domin nian iha inspetoria”. Foti indikasaun husi Leitura sira, “ita haksolok tanba ita koko Maromak nia di’ak ba nia povu”, haktuir iha profeta Sofonias. Basá Maromak hatudu mizerikórida liuhusi ema seluk, superiora sira, Irmán sira, ema seluk. “Festa Natividade nian konvida ita atu hateke kle’an liután ba domin Maromak nian. Nia hili ema ida husi ita ema atu sai prezensa reál Maromak nian”, “Maromak ho ita”. Husi Maria mak ita aprende atu hatán ba Maromak nia domin, aprende atu la’o hakamatek ba fatin  hotu, lori esperansa ba ema hotu, “buka ema sira iha periferia”, “joven sai apóstolu ba joven”.

Depoizde Missa, hotu-hotu hakat ba novisiadu atu haree prezente sira ne’ebé iha, almosu no konvíviu, iha-ne’ebé komunidade ida-idak aprezenta sira-nia santu.

Kalan, konselleira inspetoriál no diretora komunidade sira mak halo sira-nia momentu agradesimentu nian ho Ir Alma, hodi aprezenta fali videoclip husi komunidade sira kona-ba sira-nia jestu profétiku sira.