Husi Ir Ines Bartolo

Fuiloro – Iha tempu kuarezma kreda konvida sarani sira atu sai husi sira nia fatin ba hasoru kiak sira atu nune’e    bele deskobre liután Kristu nia oin iha ema kiak sira nia realidade. Ne’e mak mensajen Papa Francisco nian ba  kuarezma tinan nee.

Horisehik (Domingu, 30 Marsu 2014), irmán  sira hamutuk ho animadór/a no oratorianu sira ba halo asaun karidade iha fuiloro laran tomak. Atividade  sira mak hanesan  kuru bee,  hamoos  avo sira nia uma, ko’alia ho sira,  no fahe foos no ropa balun ba sira. Oratorianu sira sente haksolok tebes tanba sira bele halao atividade ne’e diereita ba kiak sira no mós haree realidade ne’ebe loos iha fatin sira ne’ebe kiak liu.

Husi Oratorianuo sentru Fuiloro, Irman Isaura hamutuk ho animadores no oratorianu sira ba vizita iha aladeia Bauro, Chauluturo, Luarai.  Iha fatin ne’eba sira hasoru liu mak ferik no katuas sira.

Atividade nee sei hala’o iha fulan ida dala rua iha tempu kuarezma no mós sei kontinua fulan –fulan atu nune’e bele sensibiliza foin-sa’e no labarik sira atu hatene fahe buat ne’ebé sira iha ba kiak sira  no mós sira ne’ebé presiza liu.