Husi Fatima Pereira Guterres

Fuiloro – Iha loron Sábadu, 18 Marsu 2014 ekipa Fundasaun Alola realiza atividade ida iha Koléjiu/ komunidade Madre Morano Fuiloro ho tema ‘Konxiensializasaun lori mudansa ba diskriminasaun violénsia hasoru feto’. Atividade ida ne’e realiza hodi komemora ‘Loron Internasional ba Feto’, ne’ebé mundialmente selebra iha kada loron 8 fulan Marsu.

Loloos atividade ida ne’e selebra iha loron 8 Marsu iha semana hirak liubá, maibé labele realiza iha momentu ne’eba tanba iha situasaun polítika ruma ne’ebé akontese iha parte leste hodi labele kontribui ba realizasaun atividade ne’e.

Objetivu husi atividade ne’e mak hanesan parte ida husi sensibilizasaun hodi fahe informasaun ba feto foin-sa’e sira, tanba Fundasaun Alola mak organizasaun feto ne’ebé hare liu ba parte advokasia no responsabel ba kestaun Prevensaun ba ‘Planu Asaun Nasional ba Violénsia Bazea ba Jéneru.

Razaun eskolla Koléjiu/ komunidade Madre Morano Fuiloro tanba Fundasaun Alola haree katak foin-sa’e sira hola presiza hetan informasaun ne’ebé atualizada liga ho realidade ohin loron realidade hatudu katak foin-sa’e feto sira mak barak liu sai risku ba problema oin-oin, balun mos ema bosok no balun hetan baku husi sira nia namoradu maske seidauk iha relasasun ne’ebé hakesi sira.

Tanba ne’e Fundasaun Alola integra foin-sa’e sira iha ami nia planu servisu hodi envolve sira nu’udar sidadaun ne’ebé ativu no partisipativu.