Venilale – Embaixadór Itália nian Sua Ex.cia Vittorio Sandalli, iha momentu ne’e mai vizita Timor-Leste ba apontamentu tolu: uluknanai, inaugura “campus Direitos Humanos iha Universidade Timor-Leste”; daruak vizita Eskola  Téknika Fatumaka (P. Locatteli) no Escola Técnico-Vocacional Venilale (Ir Alma); datoluk selebrasaun tinan 20 “Consulta Popular” 30 de Agostu.

Iha Venilale, iha loron 28 Agostu 2019, estudante sira simu ho knananuk “Alza il volume”. Iha ninia liafuan sira hatán ba estudante sira-nia dansa no knananuk nia hateten katak “nia sente emosaun” tan la hein sira simu ho “laran-manas hanesan ne’e”. Embaixadór fó parabéns no agradese ba organizasaun tomak, ba komunidade edukativa tomak, Ir Alma, Irmán sira, korpu dosente tomak no estudente sira.

Aprezenta tiha nia an nu’udar “embaixadór italianu iha Jakarta (Indonesia) ne’ebé iha kompeténsia mós ba Timor-Leste”, nia dehan: “Karik imi husu saida mak embaixadór ida halo, sá loos embaixadór nia knaar?” Nune’e nia dehan katak embaixadór “reprezenta ninia País iha rai-li’ur no fasilita relasionamentu entre Governu rua no populasaun rua”. Nune’e, nia hatutan, “Embaixadór ida, la reprezenta de’it nina Governu, ninia autoridade, maibé reprezenta sosiedade tomak ninia país nian”.

Nune’e: “Ohin ha’u lori kumprimentus la’ós de’it husi Governu Italianu maibé husi Povu Italianu tomak”. Tuir Sua Ex.cia Embaixadór Vittorio Sandalli, “Povu Italianu konxiente kona-ba saida mak Timor-Leste halo daudaun kona-ba solidariedade, iha kreximentu demokrátiku, iha kapasidade formasaun nian”.

Dirije diretamente ba foin-sa’e sira nia hateten: “Imi mak esperansa imi-nia País nian, imi mak foin-sa’e sira  feto no mane ne’ebé haka’as an la’ós iha estudu maibé mós iha preparasaun profisionál, hodi halo imi nia Nasaun nian buras iha futuru”. Espesialista sira dehan katak “futuru mundu nian iha Ázia, sudeste nian”, nune’e, “kontinua iha imi-nia empeñu no entuziazmu ne’ebé ohin imi hatudu tanba la’ós de’it Timor-Leste, maibé mundu tomak presiza ema hanesan imi”.

Iha ninia mensajen eskrita nia hakerek: “È un privileggio visitare questa realtà di fede, impegno educativo e sociale che prepara a svolgere tramite la scuola e professione con entusiasmo e fiducia a beneficio di Timor Est e dell’intera comunità globale”.

Depoizde almosu, Sr Embaixadór Vittorio Sandalli bá orfanatu S. Domingos Sávio, atu hasoru labarik sira ne’ebé mós, nu’udar tradisaun saleziana, simu ho ksolok, ho knananuk no dansa.