Husi Ir Ermelinda da Silva

 

Dili – Evanjellu namkari  iha mundu tomak, halo ema barak koñese Jezús no  simu batizmu  tanba misionáriu sira nia aten-brani, fiar, dedikasaun no laran-manas, ne’ebé  dudu sira husik sira nia rai, sira nia família  la’o ba rai sira ne’ebé sira la koñese atu habelar Kristu Ninia Evanjellu.

 

Iha sira nia misaun, misionáriu  balun ema lasimu, balun ema duni fila, balun hetan persegisaun oioin, balun ema oho tan sira defende fiar ne’ebé sira iha no domin ba Jezús, no  sarani sira nia fiar, sira nia dignidade, sira nia direitu no lialoos. Tan ne’e ita bolu sira misionáriu mate mean sira.  Tinan-tinan, loron 23 fulan Marsu Kreda Katólika  dedika loron ne’e ba Misionáriu Mate Mean sira.

Nune’e,iha 24 Marsu komunidade Divina Providénsia hamutuk ho foin-sa’e sira realiza rozáriu espesiál ida ho kriatividade,  ba misionáriu mate mean sira.Tersu ne’e nia nia objetivu, mak atu agradese no fó honra ba misionáriu mate mean sira, no mós ba sira ne’ebé sei moris serbisu ba evanjelizasaun iha mundu tomak. .Buat ne’ebé importante liu iha orasaun ne’e, mak  atu halo foin-sa’e sira komprende  serbisu misionáriu sira nian,  atu  hadomi sira,  liuliu atu hamoris vokasaun misionária iha foin-sa’e sira nia fuan, atu iha futuru foin-sa’e sira mós bele ho aten-brani sai misionáriu/a  haklaken Jezús nia Evanjellu iha fatin ne’ebé de’it Maromak hakarak haruka sira bá.