Iha loron 12 agostu 2019 kalan, Irmán sira iha Komunidade São José Novisiado Komoro, kumprimenta Me. Maria Nieves Reboso ho dansa no kantu  hafoin fó mós rekordasaun ruma ba Madre atu lori ba Italia. Iha okaziaun ida ne’e Madre mós fó Buona notte ba Irmán sira.

Buona Notte: Kada 13 fulan nian halo kolókiu ho Madre Mazzarello

«Agradese Maromak ba grasa wain ne’ebé Nai haraik mai ita. Hahu kedas iha loron ha’u to’o, iha selebrasaun ba renovasaun Votus, tuir mai Primeira Profisaun no ikus ho Votus Perpétua. Ho akontesimentu sira ne’e halo ha’u hanoin fali ba Madre Mazzarello nia lia fuan ne’ebé dehan: “Nai husik buat hotu hasai husi ha’u, maibé labele hasai ha’u nia fuan ne’ebé nafatin hadomi  Ita Na’i”. Madre mós repete buat ne’ebé ohin dehan ba família sira katak: ha’u hein sira halo buat ne’ebé ha’u husu mak atu família sira reza ba ita, maibé ita reza ba família sira tanba vokasaun ita mak iha vokasaun, sira bele fó lisensa maibé ita mak hala’o vokasaun ida ne’e. Ha’u hakerek ba Madre Jerál atu fahe ho nia kona-ba ambiente, simplisidade, ksolok. Aban dia 13 loron komemorasaun ba Madre Mazzarello, loro ne’e ita labele husik liu de’it, ita tenke halo kolókiu ho Me. Mazzarello tanba nia mak “La Madre”.

Madre Mazzarello nia surat mak fatuk murak ida, surat sira ne’e simples no la susar atu komprende maibé ita hare iha ne’ebá Maromak Nia domin, liuliu akompañamentu ne’ebé Me. Mazzarello halao ba Irmán ida-idak no foin-sa’e sira, nia kontinua prezente iha ita le’et, se ita la sente nia prezente ne’e depende fali ba ita ida-idak. Iha Madre nia surat sira nia nafatin fó pergunta barak “Ó diak ka lae? Ó haksolok?, nst. Nia halo pergunta sira ne’e tanba nia preokupa ba ida-idak. Nia halo hanesan ne’e uluk ba Irmán sira, agora nia mós halo mai ita husi lalehan. Nune’e, ha’u fó korajen ba imi atu kada dia 13 halo kolókiu ho Madre Mazzarello atu nia tulun ita atu hala’o Maromak nia hakarak. Se tempu iha ha’u hakarak ita fahe kona-ba saida mak gosta liu iha Me. Mazzarello maibé tanba tempu laiha ita bele halo iha tempu seluk. Maibé atu haree iha surat sira ne’e katak Me. Mazzarello nafatin fó aten-brani ba Irmán sira. Ninia hateken, ninia liafuan mak fó aten-brani, valoriza no hatudu konfiansa, nune’e ita aprende husi nia no nia mak ita-nia modelu. Buat ne’ebé furak mak nia la moris mai perfeitu ona maibé nia halo servisu ba nia-an, ita husu ba Madre Mazzarello atu haktuir nia esperiénsia rasik no nia sei halo.

Ita  mós dehan ba Me. Joana bisu-bisu de’it “Tanti Auguri”, agora labele dehan buat ida, maibé ita agradese ba Maromak ba Me. Joana nia moris no sakrifísiu ne’ebé nia halo loron hirak ne’e ho Irmán sira seluk no foin-sa’e sira atu ita hotu haksolok. Buona Notte».

OBRIGADA BARAK MADRE NIEVES.

(Noemia de Deus, FMA)