Dili – Votus perpétua Irmán FMA na’in 3, Ir Aida Belita, Ir Domingas de Deus no Ir Ermelinda, ohin, 12- Agostu- 2019, selebra iha igreja Parókia Maria Auxiliadora Comoro, hahú ho selebrasaun Eukaristia iha oras tuku 10.00 dader, ne’ebé selebra husi Amu-Bispu Dili nian, Don Virgilio no padre konselebrante sira hamutuk 15. Kreda nakonu ho família sira no relijiozu/a sira husi kongregasaun oioin, ne’ebé ho domin no fiar harohan ba sira nia oan ka Irmán nain tolu nia hatán ‘sim’ ba nafatin.

Mensajen interesante tebes ne’ebé hato’o husi Amu-Bispu Don Virgilio iha ninia omilia, hateten katak; “  uluknanain hamutuk ita agradese ba Maromak ba  don vokasaun nian ne’ebé ohin liu husi foin-sa’e nain 3, ne’ebé rona no hatán ba Maromak nia bolun, iha tinan hirak nia laran sira koko oituan iha sira nia formasaun, nune’e sira koko liu tiha ona no laiha tan dalan seluk ne’ebé di’ak liu, nune’e ikus mai sira hakarak hatán ba Maromak Nia planu ba sira, tan ne’e mak ohin tempu ida ne’ebé espesiál ba sira atu hatán ‘sim’ ba nafatin ba Maromak no saran sira nia-an.

Hanesan sira nia motto dehan atu moris besik na Maromak livremente sira hakarak tama klean liu tan ba sira nia prosimidade  no intimidade, komunhaun  ho ida ne’ebé bolu, ida ne’e mak ohin ita sasin ba Irmán  nain 3 ne’e nia ‘sim’. Hafoin Amu-Bispu hatutan katak, husi akontesimentu ohin nian, hakarak hateten ba ita katak la’ós de’it poder, la’ós de’it osan, la’ós de’it família, maibé iha mós buat ne’ebé no folin liu iha moris, ema ida labele hasai husi ita ida ne’e mak “ Kristu”.  Profisaun relijioza ida ne’e sai nu’udar enkontru domin, enkontru moris nian ho Maromak. Hanesan mós sinál ida ‘tangível’ no kredivel kona ba Maromak nia domin iha ita nia vida. Amu-Papa nia liafuan ba ita relijiozu/a sira mak husu atu ita sai sinál kredivel, liu husi ita nia moris iha komunidade no sosiedade nia leet, ita nia vida bele fó ba komunidade mensajen domin nian. Sai relijiozu ho finalidade uluknanain la’ós atu halo buat barak, maibé nia misaun mak atu fó  sasin kona ba Kristu. Kristu ida ne’ebé obediente, Kristu ida ne’ebé kastu, Kristu ida ne’ebé kiak no Kristu ida ne’ebé laran mós. Nune’e relijiozo/a sira tenke sai profisionál, profisionál atu reza, ko’alia no horik iha Na’i Maromak Nia prezensa, uniaun ho Nia. Ida-ne’e mak mundu ohin loron presiza.

Hafoin remata omilia, kontinua ho selebrasaun votu relijioza Irmán nain 3, hodi hato’o sira nia promesa iha sarani hotu ne’ebé prezente iha selebrasaun ida ne’e. Hafoin remata missa kontinua ho programa seluk iha Gymn João Paulo II.

Molok atu fahe malu madre Konselleira Jerál ba Ámbitu Formasaun nian Madre Maria Nieves Reboso, FMA, hato’o mós mensajen ba hotu-hotu ne’ebé marka prezensa no liuliu ba Irmán nain tolu no ninia família katak, ita hamutuk nu’udar família boot, família Kreda nian no família Salesiana, ohin ita tenke halo festa agradesimentu ba Irmán nain tolu sira nia hatán ba Maromak. Maromak ne’ebé sai nu’udar protagonista boot. Hakarak husik lia-menon no TPC ba imi, hahú husi família sira, madre Nieves fó  aten-brani  atu orsida molok toba família halibur hamutuk atu agradese Maromak ba imi nia oan, alin, subriña ne’ebé ohin hatán ‘sim’ ba Maromak. Nune’e ami mós nu’udar FMA molok kalan ami sei agradese ba imi nia família ida-idak, tanba família hakarak entrega ba Maromak imi nia fatuk murak husi uma-laran, imi nia oan ne’ebé hanesan rikusoin folin boot, nune’e ita moris iha komuñaun no husu ba família sira atu reza la’ós ba sira nain tolu de’it maibé ba Irmán ida-idak atu bele fiel nafatin ba projetu ne’ebé Maromak iha ba ami.

(Maria Sarmento Guterres)