Husi Ir AGATA FMA

 

Dili – Formasaun kontínua no nunka para iha ema ida-idak nia kreximentu umana no espirituál. Ohin, 24 irmán Juniora FMA halo formasaun ho Madre Paola Battagliola iha Dili–Sentru João Paulo II. Iha formasaun ne’e hahú ho Lectio kona ba “Jesus Bibi-atan Di’ak” bazeia ba Estréia Reitór-Mor nian – Karidade Pastorál.

Depoizde lectio, kontinua kedas ho tema “Formasaun nia ejizénsia sira”:  Nesesidade foun iha Formasaun, Hilin prioritáriu no estratéjia formasaun. Bainhira Madre fó tiha input, ami ida-idak buka analiza, reflete, hotu tiha fahe iha grupu ejizénsia formasaun sira ne’ebé importante liu ba ita-nia Inspetoria.

 

Grupu ida-idak hili ejizénsia tolu ne’ebé relevante liu, ikus mai resposta kuaze hanesan:

• Identidade: Kontinua buras iha-an rasik identidade nu’udar feto ne’ebé simu bolun atu sai FMA Iha kontestu sosiu-Kulturál.

Hatudu identidade FMA ne’ebé lós la’ós de’it liuhusi ita nia hatais maibé liuliu tenke hatudu liuhusi ita-nia hahalok, jestu, no liafuan.

• Konxiénsia krítika : Kapasidade atu fó razaun ba ita-nia esperansa nu’udar sarani. Nune’e Irmán sira tenke konsidera katak krítika mak nu’udar meiu ida atu tulun ema nia kreximentu la’ós nu’udar negativa.

Tenke hili buat ne’ebé di’ak no rejeita buat ne’ebé la di’ak katak latulun ema nia kreximentu iha nia vokasaun.

• Diálogu: Nesesidade komunikasaun nian liuliu iha ámbitu interkongregasionál. Haree ba realidade ohin loron diálogu entre Irmán sira komesa menus iha Komunidade, nune’e diálogu la iha labele realiza mós akompañamentu resíproku.

Nu’udar konkluzaun iha hanoin tolu ne’ebé importante liu ba FMA mak;

• Formasaun importante ba ema ida-idak nia haburas-an (to’o iis kotu).
• Iha ita-nia missaun, importante tulun foinsa’e sira halo dixernimentu ba projetu moris nian.
• Hakiak Espíritu uniaun ho Maromak.