Dili – Iha enkontru ho Irmán Diretora komunidade sira hamutuk na’in 13 ohin, 11 Agostu, Ir Maria Nieves aprezenta dokumentu hanaran “Linee Orientativi per la formazione delle neo-Direttrici” ne’ebé Institutu hasai iha tinan 2018.

Nia foti indikasaun husi Evanjellu Domingu XVIII Tinan C atu hahú, ho pergunta ida nune’e: “saida mak Maromak entrega ba ó?” Resposta mak “Misaun ida” no misaun ne’e mak governa no anima komunidade.

Irmán ida-idak fahe kona-ba knaar Diretora nian ne’ebé nia simu. Finalidade boot dokumentu ida-ne’e nian mak hamosu iha neo no la’ós neo diretora nesesidade atu forma an ba lideransa adekuada ho tempu, ba estilu salezianu animasaun no governu nian ne’ebé iha autoridade tanba koerénsia entre liafuan no jestu sira, ne’ebé fasilita envolvimentu, hotu-hotu nia obediénsia ba Maromak nia projetu no koresponsabilidade iha misaun edukativa.

Tanba ne’e presiza halo dalan formasaun nian  atu habiit atitude sira, kompeténsia sira, karakterístika pesoál sira, atu bele hala’o misaun ne’ebé entrega iha komunidade.

Iha dokumentu iha perkursu sira ho lista naruk ida ne’ebé iha ligasaun ba malu. Ir Maria Nieves halo dinámika ida ho kór sinál tránzitu nian, mean, kinur no verde, uluknanai pesoál no hafoin iha asembleia. Kór mean atu haree modalidade animasaun ne’ebé la fasilita servisu ida-ne’e no presiza “dezaprende” [disimparare]. Kór kinur kona-ba aspetu sira iha kontestu rasik ne’ebé husu atu hanoin hikas katak pasajen entre “horisehik” no “ohin”, nafatin iha Dokumentu ne’e nia roman. Kór verde kona-ba aspetu sira ne’ebé ezije mudansa mentalidade nian iha hanoin no lala’ok, kona-ba animasaun tuir Jezús nia modu rasik no karizma nian, katak atu “aprende”.

Grupu Diretora sira-nian ba kontestu (kór kinur) hili atu “assume Sistema Preventivu nu’udar espiritualidade, métodu edukativu no estilu relasionamentu nian entre Irmán sira, nu’udar eskola enkontru nian, komuñaun nian, edifikasaun resíproka, nu’udar hun ba espíritu família nian ne’ebé envolve Komunidade Edukativa tomak no liga ita ba Don Bosco no Madre Mazzarello sira-nia atitude no hilin evanjéliku sira” (dalan 9).

Ba kór verde, katak kór atu aprende, Irmán sira haburas “kapasidade atu gia no akompaña ho klaridade, hahú husi leitura fiar-na’in nian ba realidade, prosesu ida orienta nian atu fó hikas signifikadu ba vida konsagrada no misaun edukativa, iha fidelidade kriativa ba Konstituisaun FMA sira-nian no ba estilu formativu Institutu nian, nune’e promove inkultturasaun karizma nian ho modu kontínuu” (dalan 17).

Aleinde ne’e, Ir Nieves entrega mós “Orientamenti” formasaun Juniora sira-nian hodi husu ba Diretora sira no ba komunidade tomak atu akompaña sira, basá “junioradu mak etapa fundamentál atu harii identidade FMA nian”. Nia subliña katak juniora “la’ós traballadora sira maibé alin sira atu la’o hamutuk hodi moris tuir karizma ne’ebé fó mai ita”.