Venilale – “Oratóriu” liafuan ida signifika fatin reza nian… Maibé oratóriu ida lahó atividade haksoit, halimar, kanta, paseiu la’ós oratóriu. Iha oratóriu, labarik no foin-sa’e sira aprende la’ós de’it atu koñese no hadomi Maromak, maibé mós atu haburas an rasik no haburas amizade no relasaun ho ema seluk.

 

Nune’e iha oratóriu sempre iha atvidade oioin atu to’o ba objetivu ne’e. Domingu 23, ohin, oratorianu sira husi Baucau, sentru Teulale hamutuk 84 no husi sentru  Dewake hamutuk 60 halo paseiu ba Venilale atu hasoru malu ho oratorianu sira husi Uai-Bua no Lia-Oli. Molok ba Venilale, oratorianu sira ho kareta haat liu uluk ba koléjiu Fatumaka atu tuir Misa Domingu nian no halo Via-Sacra. Oratorianu sira bá hamutuk ho irmán Teresinha, irmán Miranda, irmán Albina no irmán Ernestina.  Hotu tiha orasaun sira halo almosu. Iha tuku rua loraik sira to’o iha Venilale atu halo jogu amizade ho oratorianu sira Venilale nian, husi komunidade Maria Auxiliadora nian.

Labarik sira husi Venilale fó benvinda ba Baucau oan sira, hafoin hahú jogu husi grupu feto sira-nian no hatutan ho mane sira.  Maromak haraik tempu di’ak (la udan) nune’e labarik sira bele joga. Hotu tiha atividade jogu, parte Baucau nian mak agradese fali Venilale oan sira ho knananuk no dansa Magnificat nian.

Ho fuan agradese ba Maromak no Na’i-Feto nia protesaun, sira fila fali ho di’ak no to’o iha Baucau tuku neen loraik.