Baucau – Akólitu na’in 1283 husi Dioseze Baucau halibur ba sira-nia kongresu anuál iha Escola Santo António, ESSA, Teulale-Baucau. Iha sira-nia programa, iha mós input ida kona-ba “Impaktu Social Media ba foin-sa’e sira”. Input ne’e fó husi Ir Jacinta Gusmão FMA. Aprezentasaun halo ho modalidade ne’ebé koko atu envolve grupu sira ho númeru ida boot nune’e, no labele uza “ppt” ka video tanba halo iha fatin nakloke ka iha li’ur. Nune’e, liuhusi diálogu, aprezentasaun badak no fó serbisu ba grupu sira tuir parókia ida-idak kona-ba kira “ukun-fuan sanulu ba social media”.

Iha ninia aprezentasaun Ir Jacinta koko atu evidensia foin-sa’e sira nia esperiénsia ho facebook, Instagram ka seluk iha kontestu ohin nian. Sira nu’udar “nativu dijitál” labele la uza smartphone sira. Tuir estudu sira, Social media nia platforma 5 ne’ebé “top” mak Facebook, Instagram, Snapchat, Twitter no Youtube. Husi lima ne’e ida-ne’e bele dehan “liurai” mak Facebook. Whatsapp sai plataforma ne’ebé uza liu ba grupu ka relasaun interpesoál.

Social Media ne’e di’ak ka aat?

Depende ba oinsá ita uza. Digital media mak prezente Maromak nian. Iha ninia impaktu pozitivu barak iha saude mentál hanesan kriatividade, social marketing, web connectivity/relasaun, fahe koñesimentu.

Maibé iha mós impaktu negativu. Impaktu negativu potensiál mak ansiedade no depresaun tanba social media tau espetativa aas ne’ebé la realista nune’e bele kria iha foin-sa’e sira imajen negativu an rasik nian, imajen isin nian ne’ebé perfeitu nune’e tanba la iha kria ansiedade. Bainhira foin-sa’e sira “posting” sira hakarak hetan “like” barak. Se karik la hetan sira sente la adekuadu, nune’e “delete” sira-nia post. Dalabarak social media la halo ema sai “onestu” ho an rasik ka ho “news” ne’ebé nia fahe, fakar sai sentimentu hotu iha prasa dijitál.

Impaktu negativu seluk mak kona-ba “toba”. Toba no saude mentál liga malu. Saude mentál fraku lori ba ladún toba no ladún toba lori ba saude mentál fraku. Uza device ho screen diminui ema nia relójiu internu isin nian. Ida-ne’e tanba naroman artifisiál azul ho raiu sira ne’e aumenta ita-nia alerta no la dukur, nune’e halo foin-sa’e sira nia kakutak labele aprende no rai aprendizajen.

Media social bele mós sai fatin ba “bullying”, koalia ameasa nian, obriga ema atu, manipulasaun, tolok no ida-ne’e risku boot no afeta saude mentál, edukasaun, relasionamentu. Ho espozisaun boot liután ba “messaging apps” hanesan Snapchat no WhatsApp bele hamosu problema basá apps sira-ne’e sai meiu atu haruka mensajen ameasa no abuzu nian no habelar imajen sira.

Impaktu ida tan mak “ FOMO” (fear of missing out).  Bele haree impaktu ida-ne’e bainhira foin-sa’e ka uzuáriu preokupa atu nafatin “online” atu bele hatene saida mak ema seluk halo. Maibé perigu ida mak social media la halo ita sai ema social bainhira ita-nia relasionamentu virtuál la kontinua iha relasionamentu reál. Relasaun hela de’it ho ita-nia gadgets sira, la’ós relasaun reál.

Tuir Silicon Valley insiders nia peskiza, Facebook, Snapchat, no Twitter uza ‘behavioral cocaine’ ka droga atu halo ema sai dependente ka drogadu. Sira iha enjeñeiru no tékniku barak atu halo “test” ba ema atu haree oinsá hetan dalan di’ak liu atu halo ema iha komportamentu dependénsia nian ba plataforma social media sira-nian.

Iha atividade ikus, grupu sira aprezenta “ukun-fuan social media” nian. Hotu-hotu ko’alia kona-ba oinsá uza social media ho modu pozitivu atu labele sai atan ba teknolojia maibé sujeitu teknolojia nian. Konvite ikus mak “online” ka offline” sai akólitu loos ida!