Primeira Profisaun Relijioza

Dili – Loron 05- fulan Agostu  mak nu’udar loron importante ba Institutu Filhas de Maria Auxiliadora, tan loron ida ne’e mak nu’udar loron ba Institutu nia moris, nune’e ba tinan ida ne’e, iha Ispetoria Timor Indonesia, simu no hetan tan grasa husi Maromak, ba Irmán nain 4 ne’ebé fo-an atu hatán sira nia SIM ba dahuluk iha Institutu Filhas de Maria Auxiliadora. Sira ne’e mak Irmán Domingas da Silva, Ir. Engrasia Sarmento, Ir. Sidonia no Ir. Teresa.

Selebrasaun votu relijioza ba Irmán nain 4 hala’o iha Sentru Formasaun João Paulo II, hahu ho selebrasaun EukarInstia iha oras tuku 9.30 dader. Na’i-lulik sira ne’ebé selebra Eukaristia mak Padre SDB sira, Padre Ilidio Correia nu’udar selebrante no konselebrante sira hamutuk Padre nain 7, inklui família barak husi Irmán nain 4 nian. Padre nia omilia padre dezafia Irmán hotu-hotu, liu-liu Irmán nain 4. Fofoun Padre hahu hodi komprementa Madre Nieves, Família, amu konselebrante sira no sarani hotu ne’ebé marka prezensa. Motivu husi halibur hamutuk ida ne’e mak atu reza no suporta Irmán nain 4 ne’ebé  no aten brani , hatán “YES” ba Maromak. Maske sira hatán ba tinan 1 maibe ita nia bolu ida ne’e ba nafatin. Iha leitura sira fo hanoin mai ita atu keta tauk, tan Maromak sei la’o hamutuk ho ita, hanesan iha Leitura dahuluk nian Jeremias ne’ebé Maromak fo knaar ba nia atu haklaken no husu ba nia atu keta tauk ho ninia an ne’ebé kiik, kiak kbiit laek no beik, tan Maromak hatene wainhira bolu no haruka nia sei lahusik mesak, no iha evanjellu Simaun Pedro Jezús fo aten brani atu keta tauk soe dai liu ba klaran no nia halo tuir Maromak nia lian ikus mai nia hetan ikan barak no tempu hanesan fo ba nia misaun ida, atu haklaken Maromak nia reinu, ida ne’e nu’udar mos konvite ba ita ida-idak atu hala’o, sai tiha nain ema  nian. Pergunta ne’ebé Padre husu atu reflete mak “ Ha’u soi/ cocok ka lae atu simu vokasaun ne’e ka lae?” ninia resposta bele sii, bele não. Não tanba ema lasoi duni ba Maromak Nia grasa, ne’e inisiativa husi Maromak la’ós husi ema. SIM tanba ita kolabora ho disipulo sira atu simu proposta hanesan Nain Feto. Jezùs  mak ita nia motivasaun no objetivu ikus, ita nia jornada sira presiza tau Jezùs mak iha sentru, la ho Nia ita lalao dook, ita nia vokasaun frajil hanesan kerupuk, nune’e atu sai besiasu tenki besik nafatin ba Jezús. Hodi empresta amo Papa Francisco Nia liafuan, padre husu atu Irmán nain 4 labele lakon esperansa, fiel to’o rohan hanesan Maria maske dezafiu maibé ba oin nafatin.

Hafoin missa remata família sira komprimenta Irmán nain 4, hafoin iha oras tuku 12.00 otl almosu hamutuk iha Gym João Paulo II, depois de almosu iha konviviu husi Irmán novisa sira ne’ebé aprezenta drama ne’ebé la’o hamutuk ho sira nia tema “ Tan Ita mak dehan nune’e ha’u soe duni”, iha mos kanta rua husi Irmán FMA hotu inklui mos Irmán Maria  Nieves no Irmán Alma, hamutuk hananu inu Institutu nian “ O qual Sorte”.

Irmán Maria Nieves hato’o mensajen badak ba família no Irmán nain 4, hateten katak : “maske ha’u la ko’alia  imi nia lian, maibé ha’u komprende imi ho lian fuan nian, tan ha’u haree katak imi hotu-hotu iha ne’e oin nakonu ho ksolok, hato’o obrigada ba família sira nia prezensa no Irmán nain 4 ne’ebé halo sira nia primeira profisaun. Ba ami momentu ida ne’e  mak nu’udar festa boot, la’ós tan de’it Irmán sira halo votus maibé tanba ami nia Institutu moris iha loron ida ne’e 05 de Agostu, nune’e festa boot la’ós iha Timor de’it maibé iha mundo tomak, kuaze komunidade 1.400. Iha mundo tomak Irmán sira selebra festa ba loron ida ne’e. laiha ida ne’ebé iha leet lakon nia  oan, bin ka alin feto, maibé imi manan fali família ida, tanba ami hotu Irmán sira sente família hamutuk ho imi, imi tenke kontinua akompaña sira ho imi nia orasaun, família mak família nafatin  maibé agora sira halo parte família boot liu, iha ne’ebé sira kontinua reza ba imi. Reza loron- loron ba imi nia oan no mos imi nia oan nia família katak ba Irmán hotu-hotu, nune’e  ami bele fiel nafatin ba Maromak Nia planu ba Institutu ida ne’e, atu bele tau matan didiak ba foinsa’e no labarik sira, ikus nian obrigada husi fuan no nafatin sente besik malu nafatin iha komuñaun”.

Hafoin Irmán Nieves hato’o  tiha mensajen kontinua kedas ho Irmán  Alma ne’ebé fo Irmán nain 4 nia obediensia;  mak hanesan; Irmán Engrasia ba iha komunidade Madre Morano Fuiloro, Ir. Sidonia ba iha komunidade Beata Romero Kailaku, Ir. Domigas ba iha Komunidade Maria Auxiliadora Venilale no Ir. Teresa ba iha Komunidade Beata Eusebia Palomino Comoro. Irmán hotu kontente ho Irmán nain 4 nia obediénsia, no remata  ho orasaun ikus nian ne’ebé dirije husi Padre Manuel Fraile, hodi reza ba Irmán nain 4 nian vokasaun no misaun foun.

(Maria Sarmento Guterres)