Festa S. José, padroeiru Dioseze Baucau nian

 

Baucau – Dioseze Baucau haksolok ho festa boot ninia Padroieru nian, S. José, loron 19 Marsu, ne’ebé marka mós dioseze nia aniversáriu ba dala 17. Preparasaun ba festa hahú ho novena loraik-loraik iha katedrál Baucau no ho kontestu palku muzikál.

Maski Amu-Bispu Basílio auzente ba vizita ad limina iha Roma hamutuk ho bispu na’in rua seluk, selebrasaun solene nafatin ho partisipasaun husi  sarani barak no amlulik sira reprezenta zona hotu dioseze Baucau  nian hanesan Manatutu, Viqueque, Lospalos no Baucau.

 

Solenidade hahú ho primeira véspera iha loraik tuku 6:30 iha katedrál iha ne’ebé hatudu ona partisipasaun ativa sarani nian, Seminarista sira mak anima véspera hamutuk ho padre Mário Cabral, no komentáriu ba leitura husi padre Mário de Carvalho, reitór semináriu pro[edeútico Beatu João Paulo II, Baucau.

Iha loron 19, loron S. José nian, missa prezide husi vigáriu jerál, padre Francisco Pinheiro no konselebra husi amlulik 28.  Kreda nakonu iha laran no iha resintu hotu.

Padre Francisco iha omilia destaka S. José nu’udar ema “justu”, modelu ba ema ida-idak. Liuliu, nia konvida foin-sa’e mane sira, husi tinan 17 ba leten atu ne’ebé iha ona doben atu tau sira-nia an iha S. José nia situasaun no ba feto sira atu tau sira-nia an iha Maria nia fatin. Nia hateten “José ho Maria hakarak forma família normál. Problema mak Maromak intervein no sira tama iha situasuan dilemátika”. Situasaun dilema nian nian  ne’e liga ho “lei judeu sira-nian no ema ne’ebé bele salva Maria mak José de’it” , nia hatutan.  “José la hanoin nia an, maibé hanoin de’it atu salva nia doben, no iha kalan duir ba duir mai mak Maromak intervein”. Maria hanoin de’it mak realiza misaun ne’ebé MAromak entrega ba nia, la’ós halo abortu. Nune’e, “José fila ba Maria no iha ema hotu nia oin, família ne’efamília normal ida”, maski la’ós oan Maria ko’us la’ós José nian. Nune’e mak “José sai mane justu! José la finje, maibé sai aman responsavel, proteje nia oan no inan, lori ba Ejitu atu salva nia husi Erodes… Bainhira  Jezús tinan 12, José nia misaun kompletu ona bainhira Jezús rasik haklaken katak nia Aman mak Aman Maromak. To’o iha ne’e José lakon”.

Konfronta ho situasaun foin-sa’e barak nian, padrePinheiro hateten, “mane hira mak la rekoñese nia namorada, nia oan… feto hira mak abortu, kaben-na’in hiramak sira-nia kazamentu rahun…labarik hira mak tolok sira-nia inan-aman iha lurón, kumprimenta malu eh hasee malu hodi tolok sira-nia inan eh aman iha lurón sira… foin-sa’e  hira mak dezesperadu/a, tara an, violénsia hira mak mosu entre ita… José no Maria sadik ita hotu”.

Papa Francisco hasoru bispu Timor-Leste na’in tolu, husu atu sira halo revolusaun ida hodi troka kultura violénsia ba kultura moris nian, delikadeza nian, relasaun di’ak nian. Liuhusi bispu sira, Amu-Papa sadik itahotu atu troka ita-nia hahalok violentu, agresivu, ostilidade nian, tolok nian,  ba liafuan mamar, hahalok laran-mamus nian, perdua nian, domin nian.

Se ita ida-idak hahú atu halo revolusuan eh mudansa iha an rasik, iha família, iha grupu, iha komunidade, ita bele muda sosiedade.

Remata Eukaristia, festakontinua ho almosu ne’ebé señora sira husi sentru Bakita prepara no ho animasaun teatru no múzika husi seminarista sira.

Ba festa dioseze tinan oin, zona Manatuto mak sei prepara liturjia enkuantu resesaun kontinua iha Baucau nia liman.