Papa Francisco nia katekeze – 19 Marsu 2014

 

Iha loron ne’ebé Igreja selebra S. José, Papa Francisco dedika ninia katekeze ba nia iha kuarta, 19, iha Prasa S. Pedro. Halo tinan ida, Francisco hahú ninia ministériu petrinu hodi destaka misaun no ezemplu S. José nian ba umanidade.

Asesu Katekeze ho lia-portugés

 

Iha audiénsia jerál ne’ebé ema rihun 80 halibur, Papa Francisco destaka katak S. José “merese ita-nia rekoñesimentu no devosaun tomak”.

 

Karakterístika ida santu ne’e nian mak sai protetór, Francisco hateten, hodi repete buat ne’ebé nia ko’alia iha Misa inísiu ninia pontifikadu nian tinan ida liubá. Maibé, iha katekeze ohin nia foti fali tema protesaun nian iha perspetiva seluk: edukadór nian.

“Ita hateke ba José nu’udar modelu edukadór nian, ne’ebé proteje no akompaña Jezús iha nia dalan kreximentu nian ‘iha matenek, otas no grasa’”.

Kona-ba kreximentu iha idade/otas, nu’udar dimensaun naturál, Amu-Papa fó hanoin katak S. José, hamutuk ho Maria, eduka Jezús, preokupa atu labele kuran buat nesesáriu ba dezenvolvimentu di’ak no saudavel. Hafoin, nia hanorin Jezús serbisu ida – badae-ai – no, halo nune’e, nia eduka Jezús.

Hakat ba dimensaun daruak edukasaun nian, Amu-Papa esplika katak S. José mak mestre no ezemplu ida ba Jezús, mestre ida ne’ebé habiit an ho Maromak nia Liafuan. “Ita bele hanoin oinsá José eduka labarik Jezús atu rona Sagrada Eskritura sira, liuliu akompaña Nia, sábadu-sábadu ba sinagoga Nazaré nian”.

Ikus liu, Papa Francisco ko’alia kona-ba dimensaun grasa nian. “Iha-ne’e, loos duni, parte rezerva ba S. José limitada liután kompara ho ámbitu idade no matenek nian. Maibé erru grave hanoin katak aman ida no inan ida labele halo buat ida atu eduka oan sira atu sai boot iha Maromak nia grasa”, nia subliña.

Papa Francisco esplika katak S. José tulun Jezús atu sai boot iha dimensaun tolu ne’e no iha misaun atu proteje no eduka Jezús, nia modelu ba edukadór hotu, ho modu partikulár ba aman ida-idak.

“S. José mak modelu ba edukadór no aman. Ha’u konfia ba ninia protesaun aman sira hotu, amlulik sira – sira mak aman sira! – no ema sira ne’ebé iha devér edukativu ida iha Igreja no iha sosiedade”.

Santu Padre kumprimenta aman sira hotu prezente iha Prasa S. Pedro, hodi husu ba sira grasa atu besik nafatin ba oan sira. “Sira (oan sira) presiza imi, presiza imi-nia prosimidade, imi-nia domin. Imi sai ba sira hanesan S. José: mahein sira-nia kreximentu nian iha idade, matenek no grasa”.