Venilale – Atividade sira depoizde ezame trimestre II iha Escola Secundária Técnico-vocacional “Hotelaria e Turismo” S. Maria Mazzarello iha oioin: hadi’ak valór hodi repete ezame, treinu ba tinan 25 Escola nian, grupu ka asosianizmu, limpeza, jogu no konkursu te’in hahán tradisionál.

Nune’e mak ohin, 31 Jullu, estudente sira depoizde ensaiu drama, sira halibur hodi hanoin kona-ba sira-nia pájina sosiál nu’udar kompromisu ne’ebé sira foti atu dahuluk, asumi kompromisu ho lia-loos, la publika “fake news” liuhusi ita-nia rede sosiál sira no daruak, kompromisu ba haklaken Liafoun Di’ak ba maluk sira ne’ebé hasoru virtualmente. Pájina ne’e sei sai responsabilidade asosiasaun ida-idak nian tuir loron semana nian (segunda-sesta) no data determinada fulan-fulan (13-Mazzarello, 17-Cimatti, 22-Laura, 24-Auxilium, 31-ADB). Pájina sei lansa iha loron 15 Agostu.

Atividade daruak ohin nina mak kompetisaun te’in hahán tradisionál, nu’udar preparasaun mós ba kompetisaun ne’ebé sei halo iha eventu tinan 25 Escola nian. Grupu sira te’in hahán hanesan tukir, saboko, raba-raba, katupa. Sira iha tempu oras ida atu remata buat hotu, hahú husi prepara ingrediente sira to’o aprezenta hahán ba juri sira atu fó avaliasaun.

Husi grupu neen, ita iha klasifikasaun hanesan tuirmai ne’e: fatin dahuluk mak Técnico-Alimentar 1, fatin daruak mak Hotelaria 2, fatin datoluk mak Técnico-Alimentar 2 no Hotelaria 1.

Kompetisaun no input husi juri bele sai motivasaun atu haburas liután kapasidade iha kompetisaun tuirmai bele sai di’ak liután.