Papa Francisco iha Angelus 9 Marsu 2014

Maun no bin-alin sira, bondia!

Evanjellu domingu dahuluk Kuarezma nian tinan-tinan  aprezenta epizódiu tentasaun Jezús nian, bainhira Espíritu Santu, ne’ebé tuun ba Nia hotu tiha batizmu iha Jordão, dudu nia atu enfrenta abertamente Satanás  iha rai-fuik maran, ba loron haatnulu nia laran, molok hahú ninia misaun públika.

Tentadór buka hasees Jezús husi Aman nia projetu, katak dalan sakrifísiu nian, domin nian ne’ebé oferese nia an rasik atu kasu salan, atu halo Nia foti lurón fasil, susesu no podér nian. Funu entre Jezús no Satanás akontese liuhusi sitasaun Sagrada Eskritura nian. Diabu, defaktu, atu hasai Jezús husi dalan krús nian, aprezenta ba Nia esperansa mesiánika falsa sira: moris-di’ak ekonómiku, hatudu iha posibilidade atu nakfilak fatuk iha paun; estilu espetakulár no milagrozu, ho ideia atu soe tuun an husi templu Jerusalém nia tutun no husik anju sira salva Nia; no ikus dalan ba podér no domíniu nian, troka ho hahalok adorasaun nian ba Satanás. Ne’e mak grupu tolu tentasaun nian: ita mós  hatene didi’ak sira!

Jezús ho modu desididu rejeita tentasaun sira-ne’e hotu no afirma ninia vontade metin atu tuir dalan ne’ebé Aman estabelese, hodi la kompromete an ho salan no lójika mundu nian. Imi nota didi’ak oinsá Jezús hatán. Nia la dialoga ho Satanás, hanesan Eva halo iha paraízu terrestre. Jezús hatene didi’ak katak ho Satanás labele dialoga, tanba nia espertu liu. Tanba ne’e,  Jezús envezde dialoga hanesan Eva halo, nia hili atu proteje an ho Maromak nia Liafuan no hatán ho Liafuan ne’e nia kbiit. Ita hanoin kona-ba ne’e: iha momentu tentasaun nian, ita-nia tentasaun sira, lalika argumenta ho Satanás, maibé nafatin defende an ho Maromak nia Liafuan! No ida-ne’e sei salva ita. Iha ninia resposta sira ba Satanás, Na’i, hodi uza Maromak nia Liafuan, uluknanai fó hanoin mai ita katak  «ema la moris de’it ho ai-han, maibé husi liafuan ida-idak sai husi Maromak nia ibun» (Mt 4,4; kf Dt 8,3); no ida-ne’e fó kbiit mai ita, sustenta ita iha luta kontra mentalida demundu nian ne’eb’e hatuun ema iha nivel nesesidade primária sira nian, hodi halo nia lakon hamlaha ba buat ne’ebé loos, di’ak no furak, hamlaha Maromak nian no ninia domin nian. Nia fó hanoin tan katak «hakerek mós: “Ó keta babeur Na’i ó-nia Maromak”» (v. 7), basá lurón fiar nian liuhusi nakukun, laran rua-rua, no habiit husi pasiénsia no hein ho perseveransa. Ikusnian, Jezús fó hanoin «hakerek nanis: “Na’i, ó-nia Maromak,mak ó sei adora; ba Nia de’it mak ó hana’i”» (v. 10); katak, ita tenke husik maromak falsu sira, sasán ne’ebé la folin, no harii ita-nia moris iha esensiál.

Jezús nia liafuan sira-ne’e bele haree  konkretiza iha ninia asaun sira. Ninia fidelidade absoluta ba Aman nia planu domin nian lori Nia liutiha tinan tolu atu fó konta finál ho «ukun-na’in mundu ne’e nian» (Jo 16,11), iha oras terus no krús nian, no iha ne’ebá Jezús hatudu ninia vitória definitiva, vitória domin nian!

Maun-alin doben sira, tempu Kuarezma nian mak okaziaun di’ak mai ita hotu atu halo daln konversaun nian, hodi konfronta ho modu sinseru ho pájina Evanjellu ida-ne’e nian. Ita hafoun ita-nia promesa Batizmu nian: hakribi Satanás no ninia obra hotu no babeur sira – tanba nia mak babeur-na’in ida – , atu la’o iha Maromak nia dalan sira no «to’o iha Páskua iha ksolok Espíritu nian» (Koleta Dom. I Kuarezma Tinan A).