Papa Francisco nia katekeze – 5 Marsu 2014

Iha katekeze kuarta, 5 Marsu, Papa Francisco ko’alia kona-ba Tempu Kuarezma ne’ebé Igreja hahú ohin, nu’udar Kuarta Ahi-kadesan nian. Ne’e mak períodu preparasaun ba Páskua, tempu ida ba konversaun.

Asesu Katekeze ho lia-portugés & Omilia Kuarta Ahi-kadesan nian

Francisco esplika katak, iha tempu kuarezmál, Igreja konvida asaun rua ho modu espesiál: iha konxiénsia liután kona-ba Kristu nia obra redentora no moris ho empeñu liután batizmu rasik.

Tuir Amu-Papa, konxiénsia kona-ba Na’i nia kmanek atu so’i ema hamosu iha ema atitude gratidaun nian ba Maromak. “Bainhira ita haree Maromak nia domin mai ita, ita sente vontade atu hakbesik ba Nia, no ida-ne’e mak konversaun”.

Kona-ba empeñu boot liután kona-ba batizmu rasik, Papa Francisco destaka katak halo nune’e sei la halo ita hatoman/abitua an ho situasaun sira moris-mukit nian iha ita-nia sidade no rain sira. Tuir nia, ema dala barak sai toman, mós iha sosiedade ida ne’ebé inan-aman sira la hanorin ona oan sira atu halo sinál krús. Nune’e, nia husus se labarik sira hatene halo ona sinál krús nian, harohan Ami Aman no Ave Maria. “Imi hanoin no imi hatán ba imi-nia an. Kostume komportamentu la’ós sarani nian no komodizmu narkotiza ita-nia fuan!”.

Amu-Papa destaka mós katak Kuarezma mak tempu ida propísiu atu muda rota/diresaun, atu rekupera kapasidade atu reajen iha realidade buat aat nia oin ne’ebé dezafia nafatin ita. Ne’e mak tempu ida atu moris renovasaun pesoál no komunitária, liuhusi hakbesik an ba Maromak no adezaun konfiante ba Evanjellu.

“Halo nune’e, tulun ita atu hateke ho matan foun ba maun-alin sira nia nesesidade. Tanba ne’e, Kuarezma mak momentu favoravel atu ita konverte an ba domin ba Maromak no ba maluk; domin ida ne’ebé hatene halo sai an rasik nian atitude gratuidade no laran-sadia  Na’i nian”.

Ikusnian, Papa Francisco halo lista elementu esensiál sira atu moris Kuarezma: agradese Maromak ba mistériu Ninia domin hedi iha krús tan ita, soi fiar auténtika, konverte an no loke fuan ba maun-alin sira. Nia taka katekeze hodi husu Virjen Maria nia protesaun no tulun atu akompaña sarani sira iha loron hirak ne’e, loron intensu orasaun no peniténsia nian.