Roma (Itália). Loron 5 Jullu iha Roma, iha sede Embaixada Fransa nian iha Roma, sei hala’o serimónia espesiál ida: entrega ba Madre Yvonne Reungoat, Superiora Jetál  FMA sira-nian, medalla Kavaleiru Lejiaun Onra nian. Kondekorasaun ne’e Embaixadór Fransa ba Santa Sede mak konfere, Señor Bruno Joubert, bazeia ba dekretu eis-Prezidente Repúblika Nicolas Sarkozy no eis-Ministru Alain Juppé nia proposta. Dekretu ne’ebé nomeia Madre Yvonne Reungoat Kavaleiru Orden Nasionál  Lejiaun Onra nian, asina iha loron 6 Abríl 2012.

 

«Ha’u kontente – Ministru hakerek – atu bele rekoñese dedikasaun vida ida ne’ebé dedika tomak ba kiak sira nia edukasaun. Oportunu mós subliña nia papél eminente iha diresaun Kongregasaun Irmán Saleziana sira-nian no ninia kontribuisaun atu halo koñese ita-nia Nasaun iha Roma Amu-Papa sira-nian».

 

Lejiaun Onra nian maka kondekorasaun aas liu hotu ne’ebé institui liu tiha Revolusaun Franseza. Atualmente nia fó prémiu, tuir grau lahanesan, méritu  aas sira iha servisu ba Nasaun.

Marka prezensa iha serimónia ne’e, hala’o iha Villa Bonaparte, sede Embaixada nian, Kardeál balun no Dignitáriu fransés sira iha Roma, Konsellu Jerál, Madre Yvonne nia sekretária sira, Diretora sira uma dependente sira nian, Prezidente Pontificia Facoltà dellle Scienze dell’Educazione no personalidade seluseluk tan.

Ita haksolok ho distinsaun ida-ne’e  ne’ebé Repúblika Franseza konfere, no bele lori reflesu pozitivu la’ós de’it ba Fransa, maibé ba mundu Salezianu tomak ne’ebé hala’o knaar atu tranzmite valór Evanjellu sira ba foin-sa’e sira, ho konxiénsia kona-ba benefísiu ne’ebé mai liuhusi kontaktu ho valór sira-ne’e.