DIXERNIMENTU

Fuiloro – Iha loron ikus sira Segundu novisiadu fulan dahuluk nian, husi 23-24 Jullu, ami hakle’an tema kona-ba : ‘’Dixernimentu no Akompanãmentu’’. Dixernimentu mak : Arte atu lee ba diresaun ida-ne’ebé mak hakaran sira fuan nian lori ema, hodi la husik atu monu iha babeur eh sedusaun atu ba iha fatin ne’ebé lakohi to’o ba. Dixernimentu hanesan tipu hotu koñesimentu nian liu-liu ida fiar nian mak obra ida neon no fuan nian, rezultadu husi don natural sira no ezersisiu pessoal. Husi dixernimentu halo ita hatene halo distinsaun lian ne’ebé iha ita nia laran, identifika no liberta ‘’ knananuk furak liu’’, mak arte ida, ne’ebé halo ita koñese lian ne’e mai husi ne’ebé, no ita nia fuan sira nia movimentu ba iha ne’ebé.  Dixernimentu tuir Amu-Papa (Gaudete et exsultate): Luta ho vijilansia, matan moris no konfiansa. Dixernimentu atu identifika modalidade sira ne’ebé diak liu atu akompaña foinsa’e sira, atu rekoñese no hakohak bolun ba moris nakonu no atu haklaken Evanjellu ho modu efikas hodi Rona realidade, fo hanoin kona-ba fo inportansia ba dixernimentu nian, no asaun pastoral iha Kreda.

Dixernimentu  ezize laos deit  kapasidade diak atu reflete no sentidu komum, maibe sai mos grasa ida ne’ebé ita tenke husu. Ita husu karik ba nia Espiritu Santu ho konfiansa no buka haburas nia ho Orasaun,  Reflesaun, Leitura no Konsellu diak, ita sei bele krexe iha kapasidade Espiritual nian. Hanesan iha Saun Paulo nia surat ba sarani sira iha Roma:’’keta halo tuir mundu ohin nian maibe nakfilak-an hodi hafoun imi nia hanoin, atu imi bele hatene lolos buat ne’ebé Maromak hakarak, buat ne’ebé diak, bele simu no los. Husi dixernimentu tulun ami atu haburas liu tan ami nia hilin sira iha moris loron-loron nian atu hatene halo distinsaun ba buat ne’ebé  mai husi Maromak (naroman), no mai husi Diabu (nakukun). Diabu mos hatene sujere buat ne’ebé diak no furak liu. Tan ne’e iha moris presiza nafatin matan moris atu lee situasaun no realidade ohin loron nian, hodi  asumi  liu-tan ho konstante, iha Fiar, Dexerne  iha moris Vokasaun nian.

Husi Konferensia, Maromak nia Liafuan, leitura  “Gaudete et Exsultate” (nn. 166-175) no reflesaun sira ne’ebé ami rona no haklean tulun ami atu  sai laran manas liu-tan atu ami rasik hatene moris atitude orante dixernimentu nian no tulun foin-sa’e no labarik sira iha Misaun, liu-liu hodi moris dixernimentu  iha moris umanu no moris fiar sarani nian.

Obrigada barak…………….!!! Me. Jacinta Gusmão, FMA.

Fuiloro, 24-7-2019

Segundu Noviciado 2019, Sr. Honória FMA  &  Sr. Martinha FMA.

 

AKOMPAÑAMENTU

Akompañamentu nesesidade ida, tanba iha vida espiritual ba ema ida labele la’o mesak, presiza nafatin akompañamentu iha moris tomak to’o mate. Iha ema nia moris nian ema ida presiza akompañmentu hahu husi ki’ik kedas husi familia, ita nia moris presiza nafatin akompañamentu maske ferik ka katuas ida ne’e hola parte iha ita nia moris to’o mate. Maromak nia oan mane mos hetan akompañamentu husi Maria no Jose. Ita presiza halo dalan ho ema seluk ho nune’e tulun ita atu buras nu’udar ema no espiritualmente iha vokasaun. Akompañamentu mak prosesu edukativu ida atu to’o iha nia finalidade, nune’e ita bele haré Maromak nia hakarak mai ita no husu ita atu sai sinseru no loke-an. Akompañamentu espiritual nia objetivu tulun ema ne’ebé ita akompaña atu dezenvolve nia relasaun pessoal ho Maromak ne’ebé konstante no domin. Atu hadomi Maromak presiza ema ne’ebé tasak iha akompañamentu signifika tulun ema atu realiza nia-an rasik hodi halo pasu atu dezenvolve relasaun afetiva ho Maromak. Akompañamentu  presiza iha konfiansa, ita loke-an oituan naroman oituan ita loke-an barak naroman mos barak. Atitude akompañamentu presiza loke-an, haraik-an atu ke’e, tau rai instrumentu atu nia bele buras. Akompañamentu iha relasaun  3:

• Ema ne’ebé ita akompaña
• Akompañadora no
• Maromak

Iha akompañamentu ita husik ema livre no konxiente kona ba nia komportamentu.

Iha Amu-Papa Fransisco nia Ezortasaun Evangellii Gaudium hateten “ Prudensia capasidade de comprenção a arte esperar a docilidade ao espirito, arte de escutar ajudai-nos a individuar o gesto e a palavra oportunos che nos desistalar da cómoda condição de espetatores”.

 

 

KONKLUZAUN

Husi reflesaun ne’ebé ami halo husi akompañamentu ami haré katak tulun tebes ami iha vida espiritual no humana iha ami nia kamiñu vokasional no ami ida-idak iha esperiensia kona ba akompañamentu, ne’e hanesan dalan ida atu tulun ami sai maduru iha ami nia vokasaun  atu hatan ba Nia domin ne’ebé iha mai ami liu-liu iha karisma salesiana hamutuk ho foin-sa’e sira, ami mós hatutan Nia domin no akompañamentu ba sira iha misaun. Hanesan Don Bosco halo esperiensia ho Padre Calosso no Padre Cafasso, hanesan Madre Mazzarello halo esperiensia husik padre Pestarino akompaña nia husi kedas hahu nia vida sarani, iha ninia vida foin-sa’e nian bainhira nia buka namanas Maromak nia hakaran no iha nia vida religiosa mós..

Nune’e ami mós taka ami nia enkontru segundu novisiado iha loron 24/7 2019, komemorasaun Nain Feto Maria Auxiliadora nian ho Nain Feto nia intersesaun ami harohan atu husu tulun akompaña ami iha ami nia misaun hamutuk ho foin-sa’e sira.

 

OBRIGADA Madre Jacinta Gusmao FMA.  

Writers : Sr. Cherly Marlina Moreira Da Silva

Sr. Maria Natalina De Jesus Da Costa.