Domingu I Tempu Kuarezma – Tinan A
Tema Domingu I Kuarezma
Iha inísiu ita-nia dalan kuarezmál, Maromak nia Liafuan konvida ita ba “konversaun” – katak, tau fali Maromak iha sentru ita-nia ezisténsia nian, atu aseita komuñaun ho Nia, atu rona ninia proposta sira, atu konkretiza iha mundu –ho fidelidade – ninia projetu sira.
Leitura dahuluk afirma katak Maromak hakiak ema ba ksolok no ba moris nakonu. Bainhira ita rona Maromak nia proposta sira, ita koñese moris no ksolok; maibé, bainhira ita sees husi Maromak no taka iha an rasik, ita inventa eskema egoízmu nian, foti-an nian no prepoténsia nian no harii dalan terus no mate.
