Venilale – Iha tinan ida-ne’e Inspetoria FMA haklaken katak “Nu’udar  Komunidade Edukativa  ita valoriza Maromak nia prezensa iha moris loron-loron, aprende arte akompañamentu no dixernimentu iha ida-idak nia vokasaun no tau atensaun ba ambiente dijitál”.

Komunidade Madre Mazzarello lori ho seriedade empeñu ne’e iha kontinuidade ho tinan kotuk sira. Amu-Papa Francisco nia Ezortasaun Gaudete et Esxultate, Sínodu joven sira-nian, Dokumentu Finál no Amu-Papa nia Ezortasaun Apstólika Christus Vivit sai estímulu atu bá oin iha ksolok. Reitór-Mor nia estreia kona-ba “Santidade ba ó mós” nu’udar indikasaun karizmátika konkreta atu sai hanesan Fundadór sira, Apóstolu no edukadór Santu ba foin-sa’e santu.

Foin-sa’e sira asosiasaun oioin estuda “Christus Vivit”. Estudu ne’e hala’o loron sábadu, aprezenta husi Ir Jacinta Gusmão no hafoin kontinua ho atividade iha grupu ida-idak. Konkretamente “roteiru” atu hodi estuda fahe ba parte 9 hanesan tuirmai ne’e:

1. Saida mak Maromak nia Liafuan dehan kona-ba foin-sa’e sira
2. Jezús Kristu foin-sa’e nafatin
3. Imi mak “ohin” Maromak nian
4. Anúnsiu boot ba foin-sa’e sira hotu
5. Dalan sira juventude nian
6. Foin-sa’e sira ho abut
7. Pastorál foin-sa’e sira nian
8. Vokasaun
9. Dixernimentu

Parte ne’ebé sira hakle’an ona mak 1-3 no iha parte ida-idak iha kompromisu atu halo.

Pasajen Evanjellu gia projetu komunidade edukativa nian mak “Emaus”. Aleinde ne’e, iha tinan 2019 , “Carlo Acutis”, “Servo de Deus” (iha 5 Jullu 2018) sai nu’udar modelu ba foin-sa’e sira tanba ninia modernidade, apaixonadu ida ba Eukaristia no ba internet, foin-sa’e ne’ebé moris konkretu ninia enkontru ho Jezús iha Eukaristia, “offline” ka “online”.

Ba Papa Francisco, foin-sa’e sira mak “ohin” Maromak nian, nune’e realidade oioin joven sira-nian tenke sadik ita atu bá hasoru: “Iha kondisaun naran de’it sira hela bá, ohin ha’u hakarak haklaken ba foin-sa’e buat ne’ebé importante liu, buat ne’ebé ita nunka bele nonok de’it. Ne’e mak lia-menon ne’ebé iha lia-loos boot tolu ne’ebé ita hotu presiza rona nafatin” (Christus Vivit 111). “Lia-loos dahuluk ne’ebé ha’u haklaken ba imi ida-idak mak ne’e: “«Maromak hadomi»” (Christus Vivit 112). “Lia-loos boot daruak mak Kristu, tan domin, sakrifika nia An tomak atu salva ó.” (Christus Vivit 118). “Ikus mai, iha lia-loos datoluk, ne’ebé la bele haketak husi lialos daruak: Kristu moris!”. (Christus Vivit 124).

Hodi hakarak halo tuir Carlo Acutis, grupu asosiasaun ida-idak hili ona empeñu ba grupu: moris di’ak relasaun interpesoál iha eskola, koléjiu no uma; kuidadu an no kompromisu atu hatene hili buat di’ak no la monu iha seksu livre; bá hasoru joven maluk sira ho naran konkretu, iha situasaun susar nian; ba joven sira dook no besik seluk ne’ebé horik iha planeta dijitál, lori “good news”, la’ós “fake news”.