«Maun no biin-alin sira, bondia!

Pájina evanjélika ohin nian (kf Lc 10,1-12.17-20) aprezenta Jezús ne’ebé haruka bá misaun dixípulu 72, hamutuk ho apóstolu 12. Númeru 72 provavelmente hatudu nasaun hotu. Defaktu iha livru Génesis temi kona-ba nasaun 72  (kf10,1-32). Nune’e, enviu ida-ne’e ilas Kreda nia misaun atu haklaken Evanjellu ba ema hotu. Ba dixípulu sira ne’e Jezús hateten: «To’os buras, maibé serbisu-na’in uitoan de’it! Imi harohan to’os nia na’in atu haruka serbisu-na’in ba nia to’os!» (v. 2).

Jezús nia pedidu ida-ne’e vale nafatin. Ita presiza nafatin harohan “to’os nia na’in”, Aman Maromak, atu haruka serbisu-na’in ba nia to’os, katak mundu. No ita ida-idak tenke halo ho fuan nakloke, ho attitude misionáriu; ita-nia orasaun, labele limita de’it ba ita-nia presiza sira, nesesidade sira: orasaun ida orasaun sarani loloos se iha mós dimensaun universál.

Bainhira haruka dixípulu 72, Jezús fó instrusaun loloos, ne’ebé esprime karakterístika sira misaun nian. Dahuluk – ita haree ona –: imi harohan; daruak: imi bá; no tuirmai: imi la lori  bolsu ka kohe…; imi dehan: “Dame ba uma ne’e”…imi hela iha uma ne’e… Imi keta bá husi uma ida ba uma seluk; imi fó isin di’ak ba moras sira no dehan ba sira: “Maromak nia Reinu besik ona”; no, se sira la simu imi, imi sai iha lurón sira no husik sira nia fatin )kf vv. 2-10). Orden sira-ne’e hatudu katak misaun bazeia ba orasaun; katak itinerante; la para, itinerante; katak husu haketak-an no pobreza; katak lori dame no isin-di’ak, sinál Maromak nia Reinu nia prosimidade; katak la’ós proselitizmu maibé anúnsiu no sasin; no katak husu mós frankeza no Liberdade evanjélika atu bá hodi evidensia responsabilidade rejeita mensajen salvasaun nian, maibé lahó kondenasaun no malisan.

Se moris nune’e, Kreda nia misaun karakteriza ho ksolok. No oinsá mak pasajen ne’e remata? «Sira na’in 72 fila nakonu ho ksolok» (v. 17). La’ós ksolok ne’ebé liu, ne’ebé mai husi susesu misaun nian; maibé ksolok ne’ebé nia hun iha promesa ne’ebé – Jezús dehan – imi-nia naran hakerek iha lalehan» (v. 20). Ho espresaun ida-ne’e Nia hakarak dehan ksolok interiór, ksolok ne’ebé la lakon mai husi konxiénsia kona-ba Maromak ne’ebé bolu atu tuir nia Oan. Katak ksolok sai ninia dixípulu sira. Ohin, porezmeplu, ita ida-idak, iha Prasa ida-ne’e, bele hanoin ba naran ne’ebé nia simu iha loron Batizmu nian: naran ida-ne’e “hakerek iha lalehan”, iha Aman Maromak nia fuan. No ksolok prezente ida-ne’e nian mak halo dixípulu, misionáriu ida, ida ne’ebé la’o iha Na’i Jezús nia hakmaluk, ne’ebé aprende husi Nia atu gasta nia moris lahó rezerva ba ema seluk, livre husi an rasik no husi soin rasik.

Ita invoka hamutuk Maria Santíssima nia protesaun maternal, atu nia tulun Kristu nia dixípulu nia misaun iha fatin hotu; misaun atu haklaken ba ema hotu katak Maromak hadomi ita, hakarak salva ita no bolu ita atu halo parte ninia Reinu».

.