Papa Francisco iha Angelus – 23 Fevereiru 2014

 

Maun no biin-alin sira, bondia!

Iha Leitura daruak domingu ne’e nian, S. Paulo afirma: «Ema ida la tau ninia glória iha ema sira, tanba buat hotu imi-nian: Paulo, Apolo, Cefas, mundu, moris, mate, ohin, abanbairua: buat hotu imi-nian! Maibé imi Kristu nian no Kristu Maromak nian» (1 Cor 3,23). Tanba sá Apóstolu ko’alia kona-ba ne’e? Tanba problema ne’ebé iha nia oin mak ida divizaun iha komunidade Corinto nian, iha-ne’ebé forma tiha grupu sira ne’ebé refere ba pregadór oioin hodi konsidera sira nu’udar sira-nia líder; sira heteten: «Ha’u Paulo nian, ha’u Apolo nian, ha’u Cefas nian…» (1,12). S. Paulo esplika katak modu hanoin nian hanesan ne’e laloos, basá komunidade la pertense ba apóstolu sira, maibé apóstolu sira mak pertense ba komunidade; maibé, komunidade tomak pertense ba Kristu!

 

Husi hola-parte ida-ne’e mak mai komunidade sarani sira – dioseze sira, parókia sira, asosiasaun sira, movimentu sira – diferensa sira labele kontradís faktu katak ita hotu, hodi Batizmu, iha dignidade hanesan: ita hotu, iha Jezús Kristu, mak Maromak oan! Ema sira ne’ebé simu ministériu gia nian, pregasaun nian, atu administra Sakramentu sira, labele hanoin sira nia an nu’udar na’in podér espesiál nian. maibé tau ba servisu komunidade nian, hodi tulun nian halo dalan santidade iha ksolok.

Kreda ohin konfia sasin kona-ba estilu moris pastorál ida-ne’e ba Kardeál foun sira, ne’ebé ohin ha’u selebra ho sira santa Misa ohin dadeer. Ita bele kumprimenta Kardeál foun sira, ho aplauzu ida. Ita kumprimenta sira hotu! Konsistóriu horisehik nian no Selebrasaun eukarístika ohin nian oferese mai ita okaziaun folin boot ida atu koko katolisidade, universalidade Kreda nian, ne’ebé reprezenta didi’ak husi membru Koléjiu Kardeál sira-nian mai husi parte oioin, halibur hamutuk hale’u Susesór Pedro nian. No atu Na’i haraik mai ita grasa atu serbisu ba unidade Kreda nian, atu harii unidade ida-ne’e, tanba unidade importante liu konflitu sira! Unidade Kreda nian mak Kristu nian, konflitu sira mak problema ne’ebé dalabarak la’ós Kristu nian.

Momentu litúrjiku no festa nian, ne’ebé ita iha oportunidade atu moris hamutuk iha loron rua ikus ne’e nia laran, habiit fiar, domin ba Kristu no ninia Kreda iha ita hotu! Ha’u konvida imi atu tahan Bibi-Atan sira ne’e no asiste sira ho orasaun, atu sira gia ho laran-manas povu ne’ebé konfia ba sira, hodi hatudu ba hotu Na’i nia ternura no domin. Bispu ida, Kardeál ida, Papa ida presiza tebes orasaun, atu bele tulun lori bá oin Maromak nia Povu! Ha’u dehan “tulun”, katak serví Maromak nia Povu, basá Bispu, Kardeál no Papa nia vokasaun mak ida-ne’e duni: sai serví-na’in, serví iha Kristu nia naran. Imi harhan mai ami, atu ami sai serví-na’in di’ak, la’ós na’in di’ak! Ita hotu hamutuk, Bispu sira, amlulik sira, ema konsagradu sira no sarani leigu sira tenke oferese sasin Kreda ida fiél ba Kristu, ho hakaran atu serví maun-alin sira no prontu atu bá hasoru ho aten-barani profétiku espetativa no ezijénsia espirituál mane no feto sira ita-nia tempu nian. Na’i-Feto akompaña ita no proteje ita iha dalan ne’e.