Venilale – Missa despede ilas Don Bosco ne’ebé vizita Venilale husi fulan Maiu, prezide husi Bispu Virgilio do Carmo  da Silva, SBD – Bispu Dioseze Dili nian.  Iha nia Omilia hahú ho lia fuan agradese ba Pe. Acacio de Castro, SDB no  Komisaun  ACS  (Assosiasaun  Kooperadores Salesianos) ne’ebé fó konvite atu bele mai selebra Missa encerramento  ne’e  ho  família tomak Badu-Mori nian.

Amu-Bispu hateten katak “Ho vizita  ida ne’e, hatudu  Don Bosco ne’ebé halibur ita atu reza hamutuk fó hanoin fila fali kona ba Maromak hodi hakle’an no hametin nafatin ita nia Fiar liu husi Relasaun  di’ak iha família”.  Família mak ita nia abut moris nian.  Nia dehan tan, “loron úniku ba Badu-Mori oan sira atu fahe Ksolok hamutuk”.

Leitura dahuluk  Missa nian ko’alia kona-ba profeta Elias no Eliseu. Elias kose mina ba Eliseu, foti nia tais soe ba Eliseu, katak fó poder  ba nia, maske Eliseu husu ba despede  hela nia família maibé keta  haluha  knaar ne’ebé iha  nia kabás leten. Katuas husik hela knaar ba foin-sa’e  atu kontinua lori ba oin. Foin-sa’e sira imi bele matenek to’o iha ne’ebé deit, maibé imi tenki fila fali ba imi nia abut, imi nia família, imi nia Maromak. Nia sei konsola no orienta  ita atu bele la’o iha dalan loos nian.  Momentu di’ak ida ne’e atu haree fila-fali  Don Bosco nia Ilas iha ne’e, liu husi ninia intersesaun husu grasa no bensaun ba imi nia futuru ne’ebé di’ak. Hetan futuru di’ak hahu ohin, presiza sakrifisiu. Iha leitura daruak, koalia kona-ba liberdade, livre la’ós halo buat ne’ebé hau hakarak. Maibé ita sarani komunga iha doutrina ida, fiar ida, kultura ida. Iha Evanjellu Jesus bolu ita hotu sai Maromak oan, ita simu ona mina ne’ebé kose  ona iha reen-tos, atu bele moris tuir loloos nu’udar Nia hanorin.

Don Bosco nia mensajen mak, ho orasaun mak bele transforma  ema. Amu-Bispu dehan tan “ Jesus laiha  fatin ka knuuk ida atu sadere nia ulun bá,  katak  Saran An dala ida  ba nafatin, nune’e presiza hametin nafatin  ita nia fiar. Fiar ne’ebé ita simu ona husi Maromak.  Rikusoin hotu sei liu de’it, buat ne’ebé hela nafatin  mak valór fiar no domin. Enkontro Ksolok,  Domin fiar nian mak Esperansa ba ita hotu.

(Santina Guterres)