Tema ne’ebé domina iha leitura sira ohin nian mak “enviu”: iha figura eskolante 72 Evanjellu nian, iha figura profeta anónimu nian ne’ebé ko’alia ba makhorik sira Jerusalém kona-ba Maormak ida ne’ebé hadomi sira, eh iha figura apóstolu Paulo nian ne’ebé haklaken glória krús nian, ita hetan konvite atu foti konxiénsia katak Maromak haruka ita atu fó sasin ninia Reinu.
Liuliu iha Evanjellu, mak temátika “enviu” nian hatudu klaru liután. Jezús nia eskolante sira hetan mandatu atu bá mundu hodi kontinua obra libertadora ne’ebé Jezús hahú no propoin Liafuan Di’ak Reinu nian ba ema sira rai tomak nian, lahó esesaun; sira tenke halo ne’e ho urjénsia, simplisidade no domin. Iha eskolante sira nia asaun, Reinu manán buat hotu ne’ebé hanehan no halo ema sai atan.

Leitura dahuluk, aprezenta profeta anónimu ida nia liafuan, ne’ebé simu enviu atu haklaken Maromak nia domin, domin ida nu’udar aman no inan ida ba nia povu. Profeta mak ida-ne’ebé Maromak haruka atu konsola ema sira, liberta sira husi ta’uk no hatudu esperansa kona-ba mundu foun ne’ebé atu mai.

Iha leitura daruak, apóstolu Paulo husik mai ita dalan ne’ebé nia tenke halo: la’ós interese foti-an no glória nian mak dudu nian, maibé sasin krús nian de’it – katak, sasin kona-ba Jezús, ne’ebé hadomi ho modu radikál to’o halo nia moris sai don ida ba ema hotu. Maski iha sofrimentu, apóstolu tenke fó sasin, ho moris rasik, domin radikál; husi ne’e mak hahú moris foun Ema Foun nian.

Download