Dili – Loron 26 Juñu 2019, Vigararia hotu husi Dioseze Dili halo sorumutu ho Don Virgílio do Carmo da Silva, sdb, nu’udar bibi-atan diak iha dioseze ne’e, no sorumutu ne’e hola fatin iha salaun Parokiál Katedral – Vila Verde. Vigareria OECUSSE, DILI OESTE,  AINARO, DILI LESTE, AILEU.

Sorumutu partisipa husi padre pároku sira, membru koniellu parokiál sira, no relijiozo-relijioza sira ne’ebé hola parte iha dioseze Dili. Sorumutu hahu ho orasaun maklokek nian hodi invoka Maromak Trinidade nia prezensa iha sorumutu. No kontinua ho lian fuan maklokek husi Amu-Bispu, no aprezenta realidade pastorál dioseze nian ne’ebé la’os para deit iha parokia, maibe tenki to’o iha base: eskola sira no grupu asosiasaun sira hotu. Tamba realidade sosial, kultural, ekonómiko no politiko dezafia ita nu’udar kreda. Realidade husu ita, saida mak bele halo hamutuk atu hatan ba dezafiu sira ne’e, hanesan: sekta sira, problema familia sira nian, arte marsiais, lulik fiar oin-oin ne’ebé mosu tan, no  buat seluk tan. Nu’udar bibi atan diak iha dioseze ne’e, Amu-Bispu fó hanoin fali agentes pastorais sira, oinsá, ita nia akompañamentu? Oinsá fókus liutan iha ita nia pastorál?

Hafoin kada vigararia halo avaliasaun kona ba pastorál iha fulan neen nia laran. Liu-liu atividade fórmasaun nian ba fóinsá’e sira.

Parte daruak nian, komisaun pastorál dioseze nian, aprezenta tema Pastorál 2020 nian. Hodi hateke ba Realidades : Sarani barak mak:

• – Seidauk hatene loloos vida Eukarístika
• – Sei moris iha selebrasaun superfisiál
• – Selebra Eukaristia maibé seidauk moris iha Eukaristia
• – Seidauk distingue moris sakramental husi sakramentalia no devosaun
• – Fásil liu tama iha mundo sekular nebe la fó importânsia ba vida sakramentál
• – Lakon sentidu sinais sensíveis Eukaristia nian

Realidade ne’ebé prezente iha dioseze laran,  fó naroman atu hili tema Pastorál ba 2020:

             CRISTÃO EUCARÍSTICO

HODI CRISTO, HO CRISTO,

IHA CRISTO BA AMAN MAROMAK .

Ninia objetivu mak  atu lori Kristu ba sarani sira no lori sarani sira ba Kristu (Kristaun Kristuséntriku).

Sorumutu remata ho Amu-Bispu nia lian fuan ba agentes pastorais tomak ne’ebé agora serbisu hamutuk nu’udar vigareria sira, atu kontinua kolabora hamutuk atu bele to’o iha base, liu-liu ba foin-sa’e sira hotu, liu-liu sira ne’ebé hola parte iha grupu sira ne’ebé hadook-an husi kreda. Presiza akompañamentu, bele hare kedas Don Bosco nia oan ida, husi Amu-Bispu Virgílio nia afirmasaun:” ita presiza simu no  hadomi buat ne’ebé foin-sa’e sira gosta, ne’e importante, nune’e ita  bele  akompaña no hakbesik sira  ba  hasoru JEZÙS.