Enkontru relijiozu/a sira ho Bispu Baucau

Baucau – Atu fó kontinuidade ba dalan ne’ebé dioseze Baucau halo nu’udar “Igreja no Dioseze ida”, Amu-Bispu Basílio no vigáriu ba asuntu pastorál P. Arlindo Sequeira, konvoka enkontru ida horisehik, 20 de Fevereiru ho superiór/a relijiozu/a sira iha dioseze Baucau.

Enkontru uluknanai atu rona malu, entre relijiozu no bispu, entre relijiozu sira no atu bele la’o hamutuk iha dalan koordenasaun, iha solidariedade no subsidiaridade; atu iha unanimididade iha organizasaun no la’o hamutuk ho Kreda lokál. Hanesan Amu-Bispu dehan beibeik “ita iha kilat-musan barak maibé ida-idak tiru ninian” nune’e ho enkontru ne’e bele to’o ba konverjénsia ida no hamutuk tiru alvu ida de’it hanesan trasa ona iha planu pastorál dioseze nian,katak problema família nian. Amu-Bispu rekoñese katak, relijiozu sira iha ninia karizma oioin no iha sira-nia atividade espesífika, maibé maski ho direitu pontifísiu, kongregasaun ida moris atu serví Kreda no Kreda Lokál ne’ebé husu eh simu nia.

Durante enkontru, vigararia pastorál husu rleijiozu sira nia kontribuisaun atu forma ekipa téknika ida forma husi relijiozu/a sira no leigu/a ne’ebé sei serbisu atu prepara subsídiu sira aprofundimentu nian ba tinan ida-idak iha implementasaun planu pastorál ne’e. Ekipa ba tinan ne’e forma husi P. Arlindo, P. Hermano (Capuchinho), Ir Jacinta Gusmão FMA, Ir Carolina Correia FMA, Ir Flaviana (Vitoriana), P. Rolando SDB, ir Filomena fdcc no Ir Ermínia OSU.

Hafoin, Amu-Bispu mós sujere atu iha ekipa ida pastorál itinerante ne’ebé sei la’o ba fatin-fatin atu lori tema sira-ne’e ba implementa iha baze no sei halo atu relijiozu/a sira iha grupu ne’e tenke husik komunidade ba tempu ruma. Ba sujestaun ne’e ladauk iha akordu ida. Uluknanai tanba relijioza/u sira husu atu bispu halo koordenasaun ho superiór/a provinsiál sira no razaun seluk tanba, durante diskusaun mosu ideia seluk hanesan, bolu grupu parokiál mai iha dioseze atu simu formasaun.

Oras-ne’e iha dioseze Baucau iha Kongregasaun mane-feto hamutuk 25 no uma/komunidade relijioza 44. Ba tinan ne’e mai tan kongregasaun feto rua: “Pequenas discípulas” ne’ebé sei ba hela iha Luilubo (Baucau) no Sagrada Família ne’ebé sei ba hela iha Bukoli (Baucau). Hanesan Amu-Papa Francisco nia liafuan nalian beibeik ita simu konvite husi nia atu sai Igreja ne’ebé evanjeliza iha periferia.

Partisipa mós nu’udar observadór iha enkontru ne’e, seminarista na’in rua husi dioseze Baucau ne’ebé horisehik hahú sira nia formasaun iha semináriu propedeútiku. Seminarista sira-ne’e hola parte ba grupu dahuluk hamutuk na’in 14. Abertura semináriu propedeútiku iha Baucau halo iha loron 19 Fevereiru  ho selebrasaun eukarístika prezide husi Bispu Baucau, D. Basílio no amlulik lubuk ho partisipasaun husi inan-aman no sarani barak. Fatin semináriu iha Planaltu, Vila-Nova no iha nu’udar reitór P. Mário de Carvalho no nu’udar Prefeitu P. João Jerónimo.