Cailaco-(Maliana) – Maromak nafatin presiza ita nia kolaborasaun atu ita lolo liman no hatutan Ninia ain hakat sira hodi  la’o ba periferia sira hodi lori ksolok Evanjellu nian. Hanesan Amu Papa Francisco dehan iha Evanjellu gaudium “misaun laos parte husi ha’u nia- an maibé ha’u nia-an rasik misaun ida. Ha’u nia prezensa iha mundu ne’e misaun ida. Ha’u la’ós de’it hetan bolu atu halao misaun maibé ha’u mak misaun ne’e rasik”. Konseitu husi Papa Fransisco ne’e interpela ita hotu katak ita nia ezistensia rasik mak misaun no sai furak liutan se ita hatene fahe ho ema seluk. Laiha ksolok ne’ebé boot liu fali bainhira ita hatene fahe ho ema kiak sira buat oituan ne’ebé ita iha.

Iha realidade mundu ohin loron nian kiak sai hanesan kondisaun ida ne’ebé ema kbiit laek sira enfrenta liu-liu hirak ne’ebé iha periferia. Maske ho kondisaun hanesan ne’e sira nunka lamenta no iha sira nia matan nabilan hodi espresa sai ksolok loos nian. Sira hakmatek hodi simu sira nia realidade hodi serbisu makas atu sustenta sira nia moris.

iha loron domingu Solenidade Santíssima Trindade nian komunidade Kailaco hamutuk ho foin-sa’e sira, Oratóriu no Infánsia Misionária halao apostoladu iha Asalau periferia ida ne’ebé pertense ba Cailaco. Atividades ne’ebé halao mak fahe labarik no foin-sa’e sira ba grupu – grupo atu ba visita família, reza ho sira no oferese ba família ida-ida sasan ruma nebe sira lori. Vizita mós ema moras no aleijadu sira. depois de vizita halibur labarik no família sira atu halo animasaun (jogos) hafoin reza hamutuk.

Furak tebes atu envolve foin-sa’e no labarik sira iha ita nia misaun. Tanba ho asaun ne’e bele sensibiliza sira atu hola parte iha misaun kreda nian. Tuir mai espresaun foin-sa’e no labarik sira kona sira nia esperiensia:

Cesar Mota, foin-sa’e ne’ebé lao ho ami hateten “ha’u kontente liu atu halao apostoladu hanesan ne’e tanba bele haree direita ema kiak sira nia moris iha fatin isoladu. maski kole tan lao dook kuaze oras tolu ho balun maibé ha’u kontente hodi halo sakrifísiu ida ne’e ”.

Nune’e mós labarik Infánsia Misionária Deozenia De Fatima hateten “ ha’u kontente tanba maske sei kiik maibé ami bele halo misaun kiik ida ne’e ho Madre sira. se bele nafatin envolve ami atu bele aprende sai laran luak ho ema kiak sira ”.

Espresaun husi foin-sa’e no labarik sira lori ita atu hanoin fali diálogu ho leigu sira durante kapitulujgeral XXIII “haraik mai ami laran metin atu halo projetu hamutuk ho imi, konsidera ami nu’udar protagonista interlokutór laos de’it destinatario”.

Labarik no foin-sa’e sira nia prezensa furak tebes tanba sai forsa boot ba ita iha misaun. sira kontente no entuziasmu tebes hodi hola parte iha misaun kreda nian. Importante mak ita akompaña no orienta sira.

(Albina do Carmo)