Baucau – Formasaun zonál ba animadór/a sira mak formasaun regulár tuir zona hanesan Dili, Baucau no Laga. Iha formasaun zonál hala’o loron 16 Juñu 2019 iha Baucau ninia tema mak “Christus Vivit”, katak aprezentasaun kona-ba Amu-Papa nia ezortasaun pós-sinodál dirije liuliu ba joven sira, depoizde sínodu kona-ba “Joven, fiar, dixernimentu no akompañamentu vokasionál” halo iha fulan Outubru 2018.

Aprezentasaun ne’e halo husi padre João Boavida SDB.  Tópiku sira ne’ebé nia hato’o mak foin-sa’e sira iha Bíblia, Testamentu Tuan no Testamentu Foun nian. Foin-sa’e sira ne’e sai ezemplu ba foin-sa’e sira agora nian. Amu-Papa smepre subliña katak “Foin-sa’e sira mak “ohin” Maromak nian. Foin-sa’e sira la’ós de’it “futuru” Kreda nian, maibé “prezente” Kreda nian.

Tanba sira sei foin-sa’e, sira presiza gia ruma atu gia sira, tanba da;abarak sira lakon dalan.

Pontu seluk padre aprezenta mak dezafiu sira ohin loron nian ba foin-sa’e sira no ema hotu: ambiente dijitál, migrasaun, abuzu seksuál. Kona-ba ambiente dijitál, liuliu social network (facebook, whatsup, Instagram nst), ita iha ninia pozitivu no ninia negativu. Ninia pozitivu mak fó oportunidade ba foin-sa’e sira atu partisipa iha vida sosiál no polítika sosiedade nian. Ninia negativu mak kria solidaun, perigu manipulasaun nian, fake news, no la hatudu realidad ekonkreta.

Migrasaun mós ohin loron sosiedade barak iha mundu enfrenta. Hod sai ba dook ba buka moris, família sira haketak malu, feen ho laen bele “selingkuh”. La iha vida familiár di’ak. Husi parte pozitivu mak enkontru ho kultura oioin bele hariku malu.

Kona-ba abuzu seksuál, ida-ne’e sai problema boot liután bainhira ofin-sa’e sira ta’uk atu ko’alia sai abuzu ne’ebé sira sai vítima. Dalabarak susar atu hetan solusaun, tanba ne’e presiza akompañamentu ba foin-sa’e sira.

Ikusmai, padre subliña elementu ruma ba foin-sa’e sira nia moris atu sai buras. Tempu foin-sa’e mak tempu atu halo desizaun; deside atu tuir ita-nia mehi, maibé labele haluha katak Krustu mak abut. Atu to’o ba mehi presiza sakrifísiu, pasiénsia. Labele rende no labele ta’uk koko buat foun ne’ebé di’ak ba futuru. Akompañamentu pesoál no akompañamentu iha grupu bele tulun to’o ita-nia objetivu.

Padre João taka ho fraze ida ho lia-inglés: “If you want to go fast, go alone. If you want to go far, go together”, inklui no importante liu “go with Christ”.

(Joaninha Mesquita Amaral)