Husi irmán Alma Castagna FMA

 

Dili – Iha semana rua ne’e nia laran animadór sira oratóriu nian hahú sira-nia enkontru zonál: sábadu 8 Fevereiru ba animadór sira husi zona Laga/Quelicai no Lospalos/Fuiloro, domingu 9 Fevereiru ba sira husi zona Baucau/Fatumaka/Venilale no domingu 16 Fevereiru ba parte Dili nian. Iha enkontru sira ne’e partisipa animadór sira liu 300 ne’ebé ho entuziazmu hahú fila fali sira-nia empeñu iha oratóriu.

 

Enkontru dahuluk hatán ba proposta ne’ebé animadór sira hato’o iha enkontru nasionál iha Quelicai: hakle’an animadór/a salezianu/a nia identidade. Iha tinan ida-ne’e ne’ebé Reitór-Mor konvida Família Saleziana atu hakle’an Don Bosco nia espiritualidade, animadór sira sei reflete kona-ba sira-nia identidade saleziana, sira-nia espiritualidade no kapasidade ne’ebé presiza atu sai Don Bosco nia ilas iha foin-sa’e sira leet.

Durante enkontru sira iha tempu atu fahe sira-nia esperiénsia hodi buka karakterístika sira ne’ebé sira sente importante liu atu hala’o sira-nia knaar ho kualidade no, liuliu, ho fuan ne’ebé hatudu Maromak nia domin. Haraik an, pasiénsia, ksolok, domin ba Jezús no labarik/foin-sa’e sira mak aspetu sira ne’ebé sira evidénsia husi sira-nia esperiénsia no sira sente katak presiza haboot loron-loron.

Atu enkontru sira ne’e la bele sai buat ruma ne’ebé la kona sira-nia moris, animadór/a ida-idak simu surat-tahan ki’ik-oan ida ne’ebé sei tulun sira atu avalia sira-nia prezensa iha oratóriu nu’udar animadór. Sira sei kontinua sira-nia formasaun iha nivel lokál no zona sira sei halibur malu iha fulan Juñu.