Laga – Ohin, 2 Juñu,  reprezentante  husi oratóriu sira  iha  Laga ho animadores sira ba halibur hamutuk iha Binagua hodi inagura oratóriu Beatu Albertu Marveli sai ninia mahein.

 

Albertu Marvelli mak foinsae animador ida husi oratóriu Rimini- Italia nian. Nia mak foinsae ida laran manas liu iha apostuladu, halo karidade ba ema seluk ne’ebé presiza liu no ema disportiva, Bainhira ba halo apostuladu uza bisikleta atu bele to’o lalais.

Nune’e, animador  ne’ebé sai Albertu Marvelli hamutuk ho oratorianu balun ba hein Madre provinsiál iha dalan ho bisikleta, hodi akompana Madre to’o iha kapela Binagua. Hafoin  hahu ho santa misa ne’ebé Amu Pároku Pe. Rui Gomes, SDB mak selebra.

Depoizde misa Madre Provinsiál no Padre Pároku inagura oratóriu Binagua ho naran Beatu Alberto Marvelli. Hafoin oratorianu sira dansa inu Alberto Marvelli nian “ Pedala con me”.

Ikus liu Madre Provinsiál fó lia menon ba oratorianu sira: “ iha oratóriu imi bele aprende buat barak nune’e imi  bele deskobre imi nia talentu. Tamba ho talentu ne’e imi bele tulun ema seluk, halo ema seluk bele fó Gloria ba Maromak”.

Nune’e mós ba animador/a sira: “ imi nu’udar animador/a, Albertu Marvelli sai  modelu ba imi, aprende husi nia laran manas nafatin iha momentu saida deit tanba imi mak tulun boot iha oratóriu. Husu mós ba Maromak saida mak Maromak hakarak husi imi”.

(Alice Filipe Gama)