Baucau – Ohin 15 Fevereiru, Instituto de Formação para Professores (ICFP) Baucau halo graduasaun ba estudante na’in 47; mane 17 no feto 30. Entre sira iha irmán Anita no irmán Áurea Marçal. Kursu ne’e hala’o iha tinan tolu nia laran. Estudante sira mai husi distritu 12 no prezente iha selebrasaun ne’e la’ós de’it estudante, maibé mós doadór sira no bainaka sira husi Australia inklui husi Australian Catholic University (ACU).

Serimónia hahú ho selebrasaun eukarístika iha katedrál Baucau, ne’ebé prezide husi Bispu dioseze Baucau, D. Basílio do Nascimento nu’udar na’in ba ICFP ne’e.  Iha komentáriu ba Evanjellu S. Mateus 5, 13-19, D. Basílio foka kona-ba fraze “Ema haree buat di’ak imi halo no fó glória ba Maromak”.

Uluknanai liafuan “halo”. D. Basílio hateten katak “halo” buat ida ema hotu halo; maibc “halo di’ak eh hahalok di’ak” ne’e buat seluk. “Halo didi’ak ne’e ema ne’ebé iha konxiénsia atu hao knaar ne’e ba nia an rasik nia di’ak no ba mundu nia di’ak”, nia hateten. Maromak fó knaar ba ita ida-idak tuir ita-nia talentu sira no ida-idak hatutan no hariku liután buat ne’ebé nia simu. Ida-ne’e mak sei sai sasukat atu simu prémiu husi Nia.

Ba graduadu sira nia hateten: “Uma forma imi, fó kbiit ba imi, no imi buka tan formasaun ne’e hodi kontinua iha ICFP. Sai matenek la’ós hasai diploma ida… tuir Bíblia matenek katak hatene sukat aat mak ne’ebé no di’ak mak ne’ebé, uza kakutak atu haree ne’e”. Ba D. Basílio, edukasaun tulun ita atu buka liuliu Maromak nia projetu eh planu mai ita nia moris. Sai matenek, la’ós de’it hetan títulu ida. Família, sosiedade husu buat ne’e no di’ak tebes atu ita hakat liu ita-nia inan-aman sira. Maibé matenek sukat husi kapasidade atu sai ema liután no tulun ema seluk.

Daruak liafuan “fó glória”. “Normál atu ita hein ema basa liman ba ita, gaba ita; maibé ita la moris atu ema gaba ita, atu sai boot”.  D. Basílio nu’udar bispu no na’in ba ICFP husu atu bainhira graduadu sira sai husi uma ICFP ne’e hala’o buat di’ak ne’ebé sira aprende la’ós atu ema basa liman ba sira maibé “atu ema seluk ne’ebé haree imi-nia hahalok, fó glória ba Maromak no hatene sé mak Maromak”.

Datoluk, “sai profesór/a atu leno ema nia kakutak, hatudu dalan, loke ema nia neon atu hatene dalan loos mak ne’ebé no kleuk mak ida-ne’ebé”. Maibé “buat ne’ebé triste mak ema barak ne’ebé sai husi Uma-Kreda mak aat liu, sira ne’ebé tenke hanorin relijiaun no morál mak aat liu, la hanorin nein relijiaun, nein morál. Buat ne’ebé ema aprende husi sira mak imoralidade”, Bispu hatutan. Tuir nia, Institutu mosu tanba “Uma-Kreda hakarak atu liuhusi nia forma ema Uma-Kreda nian no hatutan formasaun ba ema sira … Nu’udar bispu no na’in ba uma ne’e, ha’u hakarak atu liuhusi ninia hahalok Maromak nia naran sai morin. Se atu sai hanesan ema seluk no instituisaun seluk, di’ak liu taka”, D. Basílio resalta.

Atu taka, D. Basílio husu atu graduadu/a sira “sai profesór/a sarani, sai matenek no sai sasin”.

Hotu tiha Eukaristia, serimónia kontinua ho programa graduasaun iha salaun Dioseze Baucau hodi fahe diploma ba graduadu/a sira no prémiu/award ba estudente ne’ebé di’ak liu. Graduada ne’ebé hetan prémiu mak irmán Áurea Marçal FMA. Iha serimónia ne’e, iha mós palestra husi Dr. Rui Araújo ne’ebé ko’alia kona-ba knaar edukasaun iha Timor-Leste.