Atensaun ba maluk, rekoñese an ema maksalak no koerénsia entre liturjia no vida mak sinál ne’ebé hatudu oinsá moris Eukaristia (Papa Francisco nia katekeze – 12 Fevereiru 2014)

RV – Oinsá moris Eukaristia? Resposta ba pergunta ne’e mak sai tema ne’ebé Papa Francisco aborda iha ninia katekeze kuarta, 12 Fevereiru, iha Prasa S. Pedro. Amu-Papa ko’alia kona-ba nesesidade atu partisipa iha Eukaristia hodi iha atensaun ba ema sira ne’ebé presiza liu, hodi haree iha sira Kristu nia oin.

Asesu Katekeze ho lia-portugés

Iha semana kotuk, Papa Francisco ko’alia tiha ona kona-ba Eukaristia, ne’ebé estabele komuñaun entre ema no Kristu. Ohin, nia ko’alia kona-ba sinál tolu ne’eb´ehatudu se sarani sira moris loloos sakramentu nee’e eh lae.

 

Sinál dahuluk mak konsiderasaun ba ema seluk. Francisco fó hanoin katak Kristu nia moris tomak mak partilla ida tanba domin ba ema. Nia kuestiona, hahú husi ezemplu, oinsá ema nia atitude iha Misa.

“Bainhira ita partisipa iha Misa, ita hetan mane no feto sira tipu hotu, maibé Eukaristia ne’ebé ha’u selebra lori ha’u atu sente sira nu’udar maun no biin-alin? Nia dudu ha’u atu bá hasoru ema kiak sira, ema sira iha ninin? Nia ajuda ha’u atu rekoñese iha sira Jezús nia oin?”.

Nu’udar ezemplu, Amu-Papa temi situasaun sosiál difikuldade iha Roma, nu’udar terus tanba udan, eh falta empregu. Nia kuestiona sarani sira se loos duni preokupa ho ema sira-ne’e eh se iha Misa sira-nia preokupasaun mak repara de’it ema nia hatais, hanesan dalabarak akontese.

Sinál daruak moris di’ak Eukaristia mak sente katak ita simu perdua no ita prontu atu perdua. “Ema ne’ebé selebra Eukaristia la halo ne’e tanba hakarak katak nia di’ak liu ema seluk, maibé tanba rekoñese katak nia nafatin presiza atu simu Maromak nia laran-sadia, Maromak ne’ebé halo An ba ema iha Jezús Kristu. Ita tenke ba Misa ho haraik an, nu’udar ema maksalak”, nia hateten.

Ikusnian, Amu-Papa, ko’alia kona-ba relasaun entre selebrasaun eukarístika no komunidade nia moris. Nia resalta nesesidade atu hanoin nafatin katak Eukaristia la’ós komemorasaun umana ida kona-ba buat ne’ebé Kristu halo, maibé Kristu nia asaun rasik. “Nia mak don ida Kristu nian ne’ebé sai prezente no simu ita atu habosu ita”, Papa Francisco hateten, hodi enfatiza nesesidade koerénsia nian entre liturjia no vida.