Maun no biin-alin sira, bondia!

 

Evanjellu Domingu VI Páskua nian aprezenta mai ita pasajen ida Jezús nia diskursu nian dirije ba Apóstolu sira iha Han-Kalan Ikus (Jo 14,23-29). Nia ko’ali akona-ba obra Espíritu Santu nian no halo promesa ida: «Paráklitu, Espíritu Santu ne’ebé Aman sei haruka iha ha’u-nia naran, nia sei hanorin imi buat hotu no fó hanoin ba kona-ba buat hotu ne’ebé ha’u dehan ba imi» (v. 26). Enkuantu hakbesik daudaun momentu krús nian, Jezús asegura Apóstolu sira katak sira sei la hela mesak: ho sira iha nafatin Espíritu Santu, Paráklitu, ne’ebé sei tahan sira iha misaun atu lori Evanjellu ba mundu tomak. Iha lian orijinál gregu, liafuan “Paráklitu” signifika ida-ne’ebé tau iha sorin, atu apoia no konsola. Jezús fila hikas ba Aman, maibé kontinua hanorin no anima ninia dixípulu sira liuhusi Espíritu Santu nia asan.

Espíritu Santu ne’ebé Jezús promote nu’udar prezente, nia misaun mak ida-ne’ebé loos? Nia rasik dehan: «Nia sei hanorin imi buat hotu no sei fó hanoin ba imi buat hotu ne’ebé ha’u dehan ba imi». Iha nia moris iha rai ne’e, Jezús tranzmite buat hotu ne’ebé nia hakarak konfia ba Apóstolu sira: nia kumpre Revelasaun divina, katak buat ne’ebé Aman hakarak dehan ba umanidade ho Oan-Mane nia enkarnasaun. Knaar Espíritu Santu nian mak ida fó hanoin, katak halo komprende didi’ak no lori atu atua konkretamente Jezús nia hanorin sira. No ida-ne’e duni mak misaun Kreda nian, ne’ebé realiza liuhusi estilu presizu ida moris nian, karakteriza ho ezijénsia ruma: fiar iha Na’i no observánsia ninia Liafuan nian; dosilidade ba Espíritu nia asaun, ne’ebé halo kontinuamente sai moris no prezente Na’i Moris-Hi’as; hakohak ninia dame nian no sasin ne’ebé fó kona-ba ida-ne’e ho atitude ida abertura no enkontru nian ba ema seluk.

Atu realiza buat ne’e hotu Kreda labele paradu, maibé, ho sarani ida-idak nia partisipasaun, nia simu bolun atu atua nu’udar komunidade iha dalan, ho Espíritu Santu nia roman no kbiit, ne’ebé halo buat hotu foun. Signifka liberta an husi ligasaun mundana hotu ne’ebé reprezenta husi ita-nia pontudevista sira, ita-nia estratéjia sira, ita-nia objetivu sira, ne’ebé dalabarak hatodan ita-nia dalan fiar nian, no tau ita-nia an atu rona iha dosilidade ba Na’i nia Liafuan. Nune’e, Maromak nia Espíritu mak gia ita no gia Kreda, atu husi nia naksira oin auténtiku ida, furak no nabilan, tuir Kristu nia hakarak.

Na’i ohin konvida ita atu loke fuan ba don Espíritu Santu ian, atu gia ita iha dalan istória nian. Nia, loron ba loron, eduka ita iha lójika Evanjellu nian, lójika domin ne’ebé simu, “hodi hanorin ita buat hotu” no “fó hanoin mai ita buat hotu ne’ebé Na’i dehan mai ita”. Maria, ne’ebé iha fulan Maiu ita venra no harohan bá ho devosaun espesiál hanesan ita-nia inan lalehan, proteje nafatin Kreda no umanidade tomak. Nia ne’ebé, ho fiar hariak an no barani, koopera tomak ho Espíritu Santu ba Maromak nia Ona nia enkarnasaun, tulun ita atu husik Paráklitu hanorin no gia ita, atu nuene’ ita bele simu Maromak nia Liafuan no fó sasin kona-ba nia iha ita-nia moris.