Dili – Loron  24 Maiu,  nu’udar  loron solene ba Família Saleziana tomak, nune’e iha eskola Maria Auxiliadora  hala’o selebrasaun Eukaristia hamutuk ho estudante sira hahú husi pre-eskolár to’o eskola pré-sekundária, komunidade Edukativa. Festa ida ne’e hahú ho selebrasaun  Eukaristia, iha parókia  Maria Auxiliadora ne’ebé selebra husi Padre Ilídio Correia. Missa hahú tuku 08.30 no remata Missa, iha mós programa seluk iha eskola.

Iha selebrasaun Eukaristia estudante sira partisipa ho ksolok no atensaun maka’as. Padre nia omilia dada tebes sira-nia atensaun, nune’e sira ho hakmatek no nonok atu rona. Iha omilia, padre foka  pontu rua:  Dahuluk, padre konvida alunu/a sira atu hateke ba Na’i -Feto nia estátua ne’ebé hamutuk ho Jezús. Maria ko’us ho liman karuk, ko’us nia oan, hamnasa no hateke ba ema ida-idak, bonita, oin-midar no bolu ema hotu hodi hatudu nia Oan ba ema hotu, Na’i-Feto ne’ebé ko’us Jezús manifesta relasaun di’ak entre Oan ho mamá, dalabarak mamá terus tan oan sira nia hahalok, nakar, larona, ladús hatudu obediénsia, dalabarak liafuan tolok ne’ebé hatún mama sira nia dignidade. Padre dezafia mós estudante Maria Auxiliadora sira atu banati tuir imajen Maria Auxiliadora nian.

Parte daruak omilia nian selebrante husu atu hateke ba Maria nia ulun no liman: iha koroa no oé iha nia liman, katak atu fó orden atu halo buat ruma, iha podér no Jezús obedese Maria tanba nia liurai-feto. Milagre  mosu tan Na’i-Feto husu ba Jezús. Nune’e, ita mós keta ta’uk husu ba Na’i-Feto. Nia sei halo buat ruma, hanesan Don Bosco nia liafuan ne’ebé dehan: “ Habelar devosaun ba Na’i-Feto imi no sei haree saida mak milagre”. Se husu ba Na’i-Feto, nia sei husu ba nia Oan Jezús, tan Jezús sei interven.

Hafoin missa remata, iha  konvíviu hamutuk iha Gymn eskola Maria Auxiliadora nian, nune’e  ho ksolok estudante sira ne’ebé iha talentu kona-ba múzika no lian di’ak espresa sira nia lian furak  no dansa oioin, no molok fahe malu iha merenda hamutuk no buongiorno husi madre Sebastiana ne’ebé hato’o augúriu ba festa Inan doben Maria Auxiliadora nian.

(Maria Sarmento Guterres)