Venilale – Grupu sira iha pedagojia saleziana sai fatin no ambiente formasaun nian ba foin-sa’e sira, aleinde instituisaun edukativa formál sira. Grupu mak rekursu edukativu ne’ebé Don Bosco valoriza liu. Iha Don Bosco nia tempu nia hanaran “kompañia” sira, no ida dahuluk iha oratóriu mak “Imakulada”, ne’ebé sai rai bokur no fini ba kongregasaun Saleziana nia moris.

Tuir ita-nia Fundadór, ita promove grupu sira ho finalidade atu eduka ba lideransa no protagonizmu juveníl, iha área asaun apostólika no sosiál. Nune’e mak, husi inísiu tinan eskola nian iha ETV Hotelaria e Turismo Madre Mazzarello, propoin tiha ona ba foin-sa’e sira asosianizmu ne’ebé halibur iha Movimentu Juveníl Salezianu (MJS) nia mahon.

Grupu sira ne’ebé eziste iha ETV mak Auxilium, Amigo de Don Bosco (ADB), Madre Mazzarello, Laura Vicuña no Don Cimatti. Iha tinan ne’ebé Família Saleziana simu konvite no ezortasaun atu “sai santu/a”, hola parte ba asosiasaun espesífiku ida-ne’e husu atu hateke ba ideál santidade ne’ebé ita-nia santu no beatu sira konsege to’o.

Iha tempu fulan tolu nia laran membru sira hakle’an, hala’o empeñu sira, tuir finalidade grupu ida-idak nian. Ohin membru sira halo sira-nia promesa durante selebrasaun eukarístika. Oportunu tebes halo promesa iha vijília solenidade Maria Auxiliadora nian, depoizde loron sira novena nian, hodi tau foin-sa’e sira-ne’e nia promesa iha Inan Virjen ninia liman, hodi hametin foin-sa’e sira-nia hakaran no konstánsia.

Hotu tiha Eukaristia, iha merenda hamutuk no, kumprimenta mós Eskola nia kapelaun, Pe. Abrão ne’ebé ohin selebra ninia loron moris.