Bondo Kodi 22 Maiu 2019

Irmán doben sira,

ita besik ona Solenidade Maria Auxiliadora nian; ha’u hanoin katak, iha momentu ida ne’e, ita hotu sei reza daudaun Novena ba Maria Auxiliadora ne’ebé hatudu ita-nia domin no konfiansa ba ita-nia Inan Tulun-Na’in.

Papa Francisco, iha Ezortasaun Apostólika “Christus vivit”, fó hanoin mai ita katak “Ohin, Maria mak Inan ne’ebé hein ita, nia oan sira, iha ita-nia viajem iha moris, dala barak kole no iha susar laran, hodi ansia katak esperansa nia naroman labele mate. Tan ida ne’e mak ita-nia hakarak: katak esperansa nia naroman la bele mate. Maria ita-nia Inan hateke ba povu peregrinu ne’e: povu foin-sa’e ne’ebé nia hadomi, no ne’ebé buka nia iha silénsiu sira-nia fuan nian iha barullu tomak nia leet, tarutu no distrasaun hotu viajem nian. Ho ita-nia Inan nia matan iha ita, iha de’it fatin ba silénsiu esperansa nian.” (CV, 48)

Ita entrega ba Nia ita-nia no foin-sa’e sira nia esperansa hotu, hodi sente ita-nia responsabilidade atu halo Maria nia oin kontinua nabilan iha foin-sa’e sira leet, liuhusi ita-nia prezensa. Hanesan Madre Jerál fó hanoin iha Sirkulár ba KJ XXIV: “Akompaña husi Maria, ita simu bolun atu moris forsa jenerativa karizma nian, iha tempu istóriku ne’e, sustenta husi ksolok no kbi’it ne’ebé Espíritu Santu fó no kontinua fó, iha ita-nia tempu ohin-loron,  ho moris foun no kriatividade, nakonu ho esperansa tua foun nian, ne’ebé suli husi fiar.”

Servisu ne’ebé ita hala’o daudaun atu prepara Kapítulu Jerál mak dalan konkretu ida atu ita komprende oinsá ita bele kolabora ho Maria atu Jezús nia maksoin bele to’o iha fatin iha ne’ebé ita servisu bá, ba ema sira ne’ebé Maromak tau iha ita-nia dalan.

Tan ne’e, ha’u husu ba imi atu hala’o empeñu ida ne’e nu’udar “floriña” ba Na’i-Feto, nu’udar agradesimentu ba nia tan oportunidade barak ne’ebé ita hetan iha ita-nia moris loron-loron nian atu partisipa ba “obra” Maromak nian. Hanesan ita reza iha ita-nia orasaun konsagrasaun nian, ita husu ba Na’i-Feto atu halo ita aprende husi Nia, atu iha fuan inan nian ho foin-sa’e sira no ho ema hotu ne’ebé ita hasoru.

 

Boa festa Maria Auxiliadora

Ir. Alma