Papa Francisco iha Angelus –  9 Fevereiru 2014

 

Maun no bin-alin sira, bondia!

 

Iha Evanjellu domingu ne’e nian, ne’ebé mai tuir kedas Rahun-Di’ak sira, Jezús dehan ba dixípulu sira: «Imi masin rai nian… Imi naroman rai nian» (Mt 5,13.14). Buat ne’e halo ita hakfodak uitoan, se ita hanoin kona-ba ema sira ne’ebé iha Jezús nia oin bainhira nia hateten liafuan sira-ne’e. Sé mak dixípulu sira-ne’e? Sira mak peskadór sira, ema simples…. Maibé Jezús hateke ba sira ho Maromak nia matan, no ninia afirmasaun ita bele komprende nu’udar konsekuénsia Rahun-Di’ak nian. Nia hakarak dehan: se imi kiak iha espíritu, se imi laran maus, se imi fuan moos, se imi iha laran sadia…imi sai masin rai nian no naroman mundu nian!

Atu komprende di’ak imajen sira-ne’e, ita hanoin katak Lei ebraika haruka atu tau masin uitoan iha oferta aprezenta ba Maromak, nu’udar sinál aliansa nian. Hafoin, naroman,  ba Israel mak símbolu revelasaun mesiánika nian ne’ebé manán nakukun moris jentiu nian. Sarani sira, Israel foun, simu misaun ida iha ema hotu nia oin: ho fiar no karidade sir abele orienta, konsagra, halo umanidade sai fekunda. Ita batizadu/a hotu mak dixípulu/a misionáriu/a sira no ita simu bolun atu sai Evanjellu moris nian iha mundu: ho moris santa ita fó “sabór” ba ambiente oioin no defende nia husi korrupsaun, hanesan masin halo; no ita lori Kristu ho sasin kona-ba karidade jenuina ida. Maibé se ita sarani sira lakon sabór no  hamate ita-ia prezensa nu’udar masin no naroman, ita lakon efikásia. Maibé oinsá furak tebes misaun ida-ne’e atu fó roman ba mundu! Ne’e misaun ida ne’ebé ita iha. Furak tebes! No furak liu atu konserva naroman ne’ebé ita simu husi Jezús, tau matan ba nia, rai nia. Ema sarani tenke sai ema ida nabilan, ne’ebé lori roman, ne’ebé nafatin fó naroman! Roman ida ne’ebé la’ós ninian, maibé prezente Maromak nian, Jezús nia prezente! No ita lori naroman ne’e. Se ema sarani hamate roman ne’e, nia moris laiha sentidu: nia sarani ida ho naran de’it, ne’ebé la lori roman, moris ida lahó sentidu. Maibé oras-ne’e ha’u hakarak husu ba imi, oinsá mak imi hakarak moris? Nu’udar ahi-oan lakan eh  nu’udar ahi mate? Lakan eh mate? Oinsá imi hakarak moris? [Ema hatán: Lakan!] Ahi lakan! Maromak rasik mak haraik naroman ne’e no ita fó nia ba ema seluk. Ahi lakan! Ne’e mak vokasaun sarani.