Fatuk-murak vokasaun nian

Baucau –  Menina na’in 30 ne’ebé tama iha grupu vokasionál husi eskola St. António halo enkontru ho irmán Jacinta Gusmão. Enkontru sira ba tinan ne’e fokaliza iha deskoberta fatuk-murak vokasaun nian liuhusi modelu oioin salezianu sira-nian tuir eskema Don Bosco nia mehi kona-ba Diamante Sanulu. Iha enkontru dahuluk iha fulan Janeiru menina sira hahú ho enkontru atu koñese an rasik. No ohin enkontru ho Don Bosco, foin-sa’e.

Loron 8 Fevereiru menina sira hahú atu ho modelu santidade S. João Bosco nian ho proposta filme “Giovani, il ragazzo del sogno” ne’ebé iha ninia tradusaun ho tetun. Don Bosco mestre ba foin-sa’e sira, la’ós de’it ho ninia liafuan, maibé liuliu ho ninia ezemplu moris nian, bainhira nia sei foin-sa’e. Tinan sira hanesan 15-20 mak tinan ne’ebé foin-sa’e sira hahú halo sai tasak sira-nia hilin fundamentál sira. Ne’e mak akontese ho labarik Joãozinho ne’ebé buka ho laran manas  Maromak nia projetu ba ninia moris. Tanba ne’e mak nia husik atu sinál sira gia nia, harohan ho perseveransa, husu konsellu. Nia uza ninia talentu, don no enerjia hotu atu realiza Maromak nia mehi ba nia no serví maun-alin sira. Maski nia kiak no tenke halo sakrifísiu barak, Don Bosco la hakiduk ho difikuldade sira maibé buka manán sira ho kriatividade no konstánsia.

Molok menina sira haree filme, irmán Jacinta fó pergunta ruma atu sira hatán: 1) Sá de’it Don Bosco nia kondisaun  moris bainhira seik ki’ik no foin-sa’e?; 2) Sá de’it difikuldade sira nia tenke manán atu estuda no realiza ninia vokasaun? 3) Sá de’it ninia kualidade no talentu sira?; 4) Oinsá ninia relasaun ho mestre sira no ho kolega sira?; 5) Sá loos fatin ne’ebé amizade okupa iha ninia moris?; 6) Oinsá mak nia moris ho modu konkretu ninia relasaun ho Maromak?; 7) Defeitu eh hahalok ladún di’ak ne’ebé mak nia buka korrije?; 8) Sá mak nia halo atu deskobre ninia vokasaun?; 9) Saida mak Don Bosco foin-sa’e nia moris hanorin mai ha’u nu’udar foin’sa’e?

Pergunta ikus sira sei reflete no fahe iha semana oin, ekuantu pergunta seluk sira fahe kedas iha loron ohin.

Bom caminho!