Venilale – Loron 13 Maiu ami selebra solenidade Madre  Maria Domingas Mazzarello nian.  Selebrasaun furak tebes tanba Igreja nakonu ho labarik, foinsa’e, inan aman sira. Ho sira nia partesipasaun halo ami sente katak tebes duni Madre Mazzarello ne’e Santa ba ema hotu, tanba  wainhira ami halo-avizu iha Igreja:” fó-hatene ba sarani sira, semak se mak hakarak partesipa Madre Mazzarello nia festa aban dia 13 de Maio bele mai, iha oras tuku 6:00 loraik”.

Durante omelia Padre reitor José de Sá, SDB dehan menina husi ETV-MM no orfanato madre nia oan sira nian hatene ona kona-ba madre Mazzarello nia moris, maibé sarani sira, pre-seminariu sedauk hatene, no padre dehan  liafuan 2 ho lia portuges; saber e conhecer? Ne’e katak ita hatene ema ne’e maibé la kuñese. Exemplu padre haktuir kona  ba labarik ida ne’ebé nia hasouru iha fatin ruma no sira dada lia, no padre husu se mak ó-nia papa? Nia hatan papa nia naran maibé nia rasik dehan nia la koñese.  Nune’e se  ita hakarak atu hadomi ema ruma uluk nanain ita tenki  hatene nia moris. Foin ita rona tiha ona madre Maria Domingas Mazzarello ninia Biografia breve hanesan tuir mai ne’e:”  Maria Mazzarello moris  iha loron 9 fulan maiu tinan rihun-ida-atus-walu-tolu-nulu-resin-hitu (1837), iha knua “Mazzarelli” pretense ba Mornese Alexandria Italia.  Iha loron ne’ebé nia moris mak loron ne’ebé  nia mos simu batizmu.

Maria Mazzarello nia aman naran José Mazzarello nia inan naran Maria Madalena Calcagno.  Nia mak oan dahuluk husi oan dahituk.  Husi nia aman  nia simu sabedoria, sensu komun, domin ba serbisu, kapasidade admirasaun nian, husi mama nia aprende atu moris ho prontidaun, neon moris no firmeza.

Ho de’it tinan 12 Maria Mazzarello simu ona primeira Komuñaun, husi ne’e nia  interioriza vida sakramental no asaun.  Ho tempu hanesan ho otas kiik de’it nia halo ona voto perpetua ba virjinidade.

Iha tinan  1855 nia hahú nu’udar Filha de Maria Imakulada hodi hala’o apostuladu ka asaun karidade entre sira no iha rai  mornese laran.

Iha tinan 1864 Maria Mazzarello hasouru Don Bosco, enkontru ida-ne’e  marka momentu forte iha Maria nia moris hodi dehan:” Don Bosco ne’e santo ida, ha’u sente”.

Iha loron 5 fulan Agostu tinan 1872 Maria Mazzarello halo ninia profisaun  relijioza iha Don Bosco ninia liman, hodi saran nia-an tomak ba Maromak iha  Institutu foun Filhas de Maria Auxiliadora nian.  Husi ne’e hamutuk ho Don Bosco fó orijin ba kongregasaun Filhas de Maria Auxiliadora ka madres  Salesianas.

Iha  loron 14 fulan maiu tinan 1881 ho tinan 44 deit madre Mazzarello husik ninia moris iha mundo hodi ba kontempla Maromak  iha lalehan. Iha loron 24 fulan juñu tinan 1951 Pio XII kanoniza nu’udar Santa.

Padre remata hodi dehan saida mak ita bele aprende husi  Madre Mazzarello ninia moris no nia virtude sira? Nia hadomi tebes Eukaristia, exemplu husi nia uma ba parokia dook liu, nia tenki  hader dadersan nakukun atu ba misa, maski malirin nakonu ho neve, dala ruma nia tenki kesi karau nia talin iha ninia an, nune’e karau book an nia bele hader lalais atu bele ba misa, molok ba misa nia ba uluk kuru bee, prepara aihan ba nia familia. Husi ne’e hatudu katak  Madre Mazzarello hadomi tebe tebes  Jesus no ezemplu seluk  husi ninia Janela uma nian nia bele haree lampu Santissimo nian ne’ebé lakan hela, nia halo adorasaun husi ninia janela no distansia dook, fofoun nia mesak, tuir mai nia alin sira, hafoin familia tomak. Mai ita aprende husi Madre Mazzarello Virtude hirak ne’e no virtude seluk hanesan haraik, sakrifisiu, karidade  no inan no mestra  ne’ebé loos.

Misa hotu tiha komunidade tolu  halibur  hamutuk  iha komunidade Maria Auxiliadora  hodi kontinua festa.

(Ir Domingas & Ir.Olga)