Fuiloro – Tinan ne’e selebrasaun ba festa Don Bosco (311-2014) iha Fuiloro iha eventu 3 ne’ebe importante liu ba povo/ sarani Fuiloro.

1. Uluk nanain tinan nee selebra tinan 65 Prezensa Kongregasaun salesiana iha Fuiloro,
2. Tinan 25 Eskola Agrikula / SPP harii iha Fuiloro,
3. Inagurasaun Jinaziu ne’ebe hetan suporta husi Governo Timor Leste. “DON  BOSCO JUBILEE HALL”

Membro Governo neebe marka prezensa iha iha eventu ne’e mak Vice Primeiro Ministro,  Sr. Fernando de Araujo Lasama, Prezidente Parlamentu, Sr. Vicente Guterres, Secretario Estado, Duputado/a husi Parlamentu, Autoridade Lokal  no mos povo  tomak Sarani  Fuiloro.

Molok atu atu selebra festa Don Bosco iha mos preparasaun husi komisaun Organizadora haree hamutuk iha parte espiritual mak hanesan Novena ba Don Bosco iha loron sia (9) nia laran ho  tema sira ne’ebe SDB no FMA sira fahe iha reflesaun kona ba Dimante 10 ( Fe, Esperansa, Karidade, Teperansa, Pureza, serbisu, Pobreza, Obedensia, Jezun, Premiu) iha orasaun nia laran.

Iha loron 30 Janeiru antigos/a alunos sira mos halo runiaun ida hodi fahe fila fali reflesaun ruma ne’ebe sira hetan iha kolejiu fuiloro. iha sasin rua ne’ebe fahe sira nia reflesaun ba sira nia maluk sira kona ba Prezensa salesiano sira mai iha rai fuiloro iha tinan 1948. Misionario Primeiru mak Pe. Jose Rodrigues, Sr. Jose Ribeiro pe. Joaquim.

Sr. Antero Rodrigues fo sasin katak iha ninia tempu, nia los duni haree salesiano sira  fo an duni atu serbi no fo edukasaun diak ba foinsae sira. tan nee ema barak mak hetan edukasun diak husi salesiano sira dahuluk. Obras ne’ebe uluk sira hahu, oras nee ita bele haree katak buat barak ne’ebe lao ba oin tanba salesiano sira fo an liu atu eduka  ho matenek ne’ebe sira iha. Salesiano sira prepara ema ba edukasaun hafoin haruka sira ne’ebe preparadu ba fali hanorin iha aldeia seluk ne’ebe seidauk hetan edukasaun, ida nee mak esperensia ne’ebe sr. Anteiro fahe.

Sr. Alberto Passos mos fahe reflesaun katak uluk ho padre nain 2 ho kojutor(Bruder) 1 sira  fo edukasaun baziku ba joven sira, iha tinan 1989 hahu ho Pe. Jose Vataparambli,Sdb, harii eskola agrikula/ SPP too agora halo ona tinan 25.

Iha kalan Menino /a sira husi kolejiu hatudu mos drama badak kona ba Don Bosco nia moris ba membro parlamento no mos sarani fuiloro tomak iha kalan.

Iha drama nee subliña katak Don Bosco mai familia kiak, maibe nia nafatin laran metin iha Maromak nia providensia tan ne’e nia konsege sai nai Lulik ida ho motivo ida atu ajuda foinsae sira ne’ebe abandona / ema latau matan. Maski ida nee misaun ne’ebe defisil maibe nia laran metin ba Maromak e mos ba Nain Feto tulun Nain.

Iha dadersan dia 31 janeiru, inagurasaun Jenaziu   husi sr. Lasama  bensaun ba jenaziu nee husi Provinsial Pe. Joao Paulino Aparicio  Guterres no partisipa iha inagurasun nee mak  membro Governo sira ne’ebe marka prezensa iha fatin ne’e. Monumentu n’e e hetan asinatura husi Premeiro Ministro, Sr. Xanana Gusmao no Pe. Povinsial Pe. Joao Paulino Aparicio Guterres, SDB.

Tuir mai selebrasun eukaristika nebe preside husi pe Provinsial. Iha nia omilia fo hanoin fila fali kona ba Don Bosco mai husi familia kiak, maibe nia laran metin total ba Maromak tanba matenek hotu ne’ebe ema iha mai husi Nai Maromak.  Nia hatutan liu tan kona ba oinsa Don Bosco nia Misaun espesial  ba foinsae  sira ne’ebe kiak. Don Bosco  fo prioridade liu ba foinsae sira tanba  se ita la fo prioridade ba joven mak ikus sei  sai problema ba  familia no sosiedade ne’eebe oras nee ita enfrenta .Nia mos fo hanoin  ba familia sira katak familia mak centro edukasaun ba oan sira.

Iha mos diskursu badak husi Vice Primeiro Ministro Sr. Fernando Lasama, kona ba dezenvolvemento ne’ebe ohin loron  ita  hare katak iha mudansa boot husi parte  kreda ho  Governo ne’eebe  serbisu hamutuk ba povo tomak nia diak. Povo sarani sira mak kaer  Governo.  Ita ida-idak nia kontribusaun ba nasaun no kreda mak  serbisu hamutuk  hodi dezenvolve ita nia nasaun doben Timor Leste.

Husi Prezidente Parlamento fo apelo ba joven sira katak aproveita estuda didiak tanba mundu avansadu ba oin lalais. Presiza prepara professores ne’ebe kualidade no onesto. Presisa Profesores ne’ebe  kompeten atu nunee bele produz alunos sira ne’ebe diak ba ita nia nasaun.

Padre Jose Vattaparambli  mos agradese ba Governo no benfeitores ne’ebe ajuda tebes jinaziu nee too remata iha fulan haat nia laran. Nia dehan buat  hotu ne’e mai husi Nai Maromak nia providensia tanba ho ita nia kbiit ita labele halo buat ida. Nia dehan ita tau ita nia forsa tomak iha Maromak no mos ita presiza fiar malu atu buat hotu lao diak iha tempu los.

Ho Maromak nia tulun ita bele haree Jinaziu ida furak no boot ne’ebe hari iha rai Fuiloro.

(Ines Bartolo FMA)