Papa Francisco iha Angelus –  2 Fevereiru 2014

 

Maun no biin-alin sira, bondia.

 

Ohin ita selebra festa Aprezentasaun Jezús nian iha templu. Iha data ne’e mós selebra Loron Vida Konsagrada nian, ne’ebé fó hanoin importánsia ba Kreda husi ema sira ne’ebé hakohak vokasaun atu tuir Jezús besik liu iha dalan konsellu evanjéliku nian. Evanjellu ohin nian haktuir katak, loron haat-nulu liutiha Jezús nia moris, Maria no José lori Kosok-Oan ba templu atu oferese no konsagra nia ba Maromak, hanesan Lei ebraika haruka.

Epizódiu evanjéliku ne’e konstitui mós íkone doasaun/saran moris rasik nian husi sira ne’ebé, tanba don ida husi Maromak, asume trasu típiku Jezús virjen, kiak no obediente nian.

 

Oferta an rasik nian ba Maromak kona sarani hotu, basá ita hotu simu bolun atu oferese an ba Aman ho Jezús, hodi halo ita-nia moris don jenerozu ida, iha família, iha serbisu ba Keda, iha obra mizerikórdia sira nian. Maski nune’e, konsagrasaun ne’e relijiozu/a sira, monje sira, leigu konsagradu sira mak moris ho modu partikulár, tanba ho profisaun votus nian sira pertense tomak no ezkluzivu ba Maromak. Pertensa ba Na’i ida-ne’e permete sira ne’ebé moris ho modu auténtiku atu oferese sasin espesiál ida ba Evanjellu Reinu nian. Maromak konsagra sira totalmente ba Nia atu entrega sira totalmente ba maun-alin sira, atu lori Kristu nia naroman iha-ne’ebé nakukun sai mahar liu no atu habelar ninia esperansa iha ema dezanimadu sira nia fuan.

Ema konsagradu/a sira mak sinál Maromak nian iha ambiente oioin moris nian, sai fermentu ba kreximentu sosiedade ida justu no fraterna liután, sai profesia partilla nian ho ema ki’ik no kiak sira. Hodi komprende no moris nune’e, vida konsagrada hatudu ninia an loloos: nia mak don ida Maromak nian, don ida Maromak nian ba Kreda, don ida Maromak nian ba ninia Povu! Ema konsagrada ida-idak mak don ida ba Maromak nia povu ne’ebé la’o hela iha rai. Iha nesesidade boot ba prezensa sira-ne’e, ne’ebé habiit no hafoun empeñu difuzaun Evanjellu nian, edukasaun kristán nian, karidade ba sira ne’ebé presiza liu, orasaun kontemplativa nian; empeñu formasaun umana nian, formasaun espirituál foin-sa’e sira-nian, família nian; empeñu ba justisa no dame iha família umana. Maibé ita hanoin uitoan sá mak sei akontese se la iha irmán sira iha ospitál, irmán sira iha misaun, irmán sira iha eskola. Maibé imi hanoin tok Kreda ida lahó irmán sira! Ita labele hanoin: sira mak don ne’e, fermentu ne’ebé lori ba oin Maromak nia Povu. Boot tebes feto sira ne’ebé konsagra sira-nia moris ba Maromak, ne’ebé lori ba oin Jezús nia mensajen.

Kreda no mundu presiza sasin ida-ne’e, sasin Maromak nia domin no laran-sadia nian. Ema konasagradu/a sira, relijiozu/a sira mak sasin Maromak ida di’ak no mizerikordiozu. Tanba ne’e presiza valoriza ho gratidaun esperiénsia sira vida konsagrada nian no hakle’an koñesimentu karizma oioin no espiritualidade nian. Presiza harohan atu foin-sa’e barak hatán “sin” ba Na’i ne’ebé bolu sira atu konsagra totalmente ba Nia ba servisu lahó interese ba maun-alin sira; konsagra moris atu serví Maromak no maun-alin sira.

Tanba motivu sira-ne’e hotu, hanesan fó sai tiha ona, tinan oin sei dedika ho modu espesiál ba vida konsagrada. Husi oras-ne’e kedas ita entrega inisiativa ne’e ba Virjen Maria no S. José nia intersesaun, ne’ebé nu’udar Jezús nia inan-aman, sai ema dahuluk ne’ebé simu konsagrasaun husi Nia no konsagra sira-nia moris ba Nia.