Omilia Papa Francisco nian

Bazílika Vaticana
Domingu, 2 Fevereiru 2014

 

«Festa Aprezentasaun Na’i nia iha Templu hanaran mós festa enkontru nian: iha liturjia, iha nia inísiu, hateten katak Jezús bá hasoru nia Povu, enkontru entre Jezús ho nia Povu; bainhira Maria no José lori sira-nia kosok-oan ba Templu Jerusalém nian, akontese enkontru dahuluk entre Jezús ho ninia povu, reprezenta husi katuas Simeão no ferik Ana.

Momentu ne’e mós enkontru ida iha entre foin-sa’e sira no katuas-ferik sira: foin-sa’e sira mak Maria no José, ho sira-nia oan foin moris; no katuas-ferik sira mak Simeão no Ana, personajen rua ne’ebé frekuenta nafatin Templu.

Ita observa sá mak evanjelista Lucas dehan kona-ba sira, oinsá nia deskreve sira. Kona-ba Na’i-Feto no S. José nia repete ba dala haat katak sira hakarak halo buat ne’ebé Na’i nia Lei haruka (kf Lc 2,22.23.24.27). Bele kapta, kuaze bele haree katak Jezús nia inan-aman sira haksolok atu kumpre Maromak nia ukun-fuan sira, sin, ksolok atu la’o iha Na’i nia Lei sira! Sira kabe-na’in foun na’in rua, sira foin hetan sira nia oan, no sira hotu animadu ho hakaran atu kumpre buat ne’ebé haktuir iha Lei. Buat ne’e la’ós faktu esteriór ida, la’ós atu sente hakmatek, lae! Ida-ne’e mak hakaran forte ida, profundu, nakonu ho ksolok. Ne’e mak buat ne’ebé Salmu hateten: «Iha ita-nia hanorin sira mak ha’u-nia ksolok… Ita-nia Lei mak ha’u-nia ksolok (119,14.77).

No sá mak S. Lucas dehan kona-ba katuas-ferik sira? Nia sublña liu ba dala ida katak Espíritu Santu gia sira. Kona-ba Simeão nia afirma katak nia ema justu no harohan-na’in, katak nia hein konsolasaun Israel nian, no katak «Espíritu Santu horik iha nia» (2,25); dehan katak «Espíritu Santu fó hatene ba nia» katak molok nia mate nia sei haree Kristu, Mesias (v. 26); no ikusmai nia ba iha Templu «hodi Espíritu nia kbiit» (v. 27). Kona-ba Ana,  Lucas hateten katak nia «profeta feto ida» (v. 36), katak simu inspirasaun husi Maromak; no katak nia horik nafatin iha Templu «serví nafatin Maromak ho jejún no harohan» (v. 37). Atu habadak, katuas-ferik sira-ne’e nakonu tebes ho moris! Sira nakonu ho moris tanba Espíritu Santu mak anima sira, sira laran nakloke ba ninia hahalok, sensivel ba ninia inspirasaun sira…

No haree bá enkontru entre Santa Família no reprezentante na’in rua Maromak nia povu santu nian, iha sentru iha Jezús. Nia mak book buat hotu, dada sira na’in rua ba Templu, katak nia Aman nia uma.

Ne’e enkontru ida entre foin-sa’e sira nakonu ho ksolok iha observasaun Na’i nia Lei nian ho katuas-ferik sira nakonu ho ksolok tanba asaun Espíritu Santu nian. Ne’e mak enkontru singulár ida entre observánsia no profesia, iha-ne’ebé foin-sa’e sira mak kumpridór/a Lei nian no katuas-ferik sira mak profétiku sira! Iha realidade, se ita reflete di’ak, observánsia Lei nian mós hodi Espíritu hanesan nia kbiit, no profesia mós la’o tuir dalan ne’ebé Lei trasa. Sé mak ema ne’ebé nakonu ho Espíritu Santu liufali Maria? Sé mak ema ne’ebé mak laran nakloke ba Espíritu nia asaun liufali nia?

Iha sena evanjélika ne’e nia roman ita hateke ba vida konsagrada nu’udar enkontru ida ho Kristu: Nia mak mai hasoru ita, Maria no José mak lori Nia, no ita la’o hasoru Nia, gia husi Espíritu Santu. Maibé Nia mak iha sentru. Nia mak dudu buat hotu, Nia mak dada ita ba Templu, ba Kreda, iha-ne’ebé ita bele hasoru Nia, rekoñese Nia, simu Nia, hakohak Nia.

Jezús mai hasoru ita iha Kreda liuhusi karizma fundasaun Institutu ida-nian: furak tebes atu hanoin ita-nia vokasaun hanesan ne’e! Ita-nia enkontru ho Kristu foti forma iha Kreda liuhusi karizma ninia sasin -mane ida nian, ninia sasin-feto ida-nian. Buat ne’e nafatin halo ita admira no halo ita agradese.

No iha vida konsagrada ita moris enkontru entre foin-sa’e sira no katuas-ferik sira, entre observánsia no profesia. Ita labele haree buat rua ne’e nu’udar realidade ne’ebé kontra malu! Mai ita husik atu Espíritu Santu anima sira rua hotu, no sinál ne’e nian mak ksolok: ksolok atu observa, atu la’o tuir regra ida moris nian; no ksolok atu husik Espíritu gia, nunka sai ríjidu, nunka taka an, nafatin nakloke ba Maromak nia lian ne’ebé ko’alia, ne’ebé loke, ne’ebé gia, ne’ebé konvida ita atu bá to’o orizonte.

Komunika sabedouria ba foin-sa’e sira halo di’ak ba katuas-ferik sira; no rai didi’ak patrimóniu esperiénsia no sabedouria ne’e halo di’ak ba foin-sa’e sira, no lori bá oin, la’ós atu rai didi’ak iha muzeu ida, maibé atu lori ba oin hodi enfrenta dezafiu sira ne’ebé moris aprezenta mai ita, lori bá oin ba família relijioza ida-idak no ba Kreda tomak nia di’ak.

Grasa mistériu ne’e nian, mistériu enkontru nian, leno ita no konforta ita iha ita-nia dalan. Amen».