Papa Francisco, espesialmente iha fulan marianu ida-ne’e, husu ita liuhusi tweet ba orasaun Santu Rozáriu nian.

Bainhira kumprimenta peregrinu sira lia-italianu iha final Audiénsia Jerál iha kuarta, 8 Maiu, Papa Francisco fó hanoin katak ohin memória “Súplika ba Na’i-Feto Pompeia nian”, no husu ba Nia atu “dirije nia hateken ba mundu no harohan daet ba Kreda tomak no ba sira nee’bé terus iha isin no espíritu”. Aleinde ne’e, nia rekorda katak iha Argentina selebra Solenidade Na’i-Feto Luján nian, Padroeira País nian. Iha mensjaen ida iha twitter @Pontifex, nia husu ba Na’i-Feto Virjen Rozáriu nian atu tulun ita “sai fuan no klamar ida de’it, povu santu iha salan ba  pátria Lalehan”.

Fulan Maiu

Ita iha fulan Maiu, fulan marianu loloos. No iha tweet kuarta, 8 Maiu nian, Papa Francisco fó hanoin tan atu iha loron sira Virjen Maria nian ne’e, ita tenke reza no husu ninia intersesaun. “Maromak nia Inan akompaña ita no proteje sarani sira iha funu hasoru forsa sira aat nian. Ita konfia iha Nia no ita harohan ba Kreda no ba pás iha mundu, nia hakerek iha tweet 4 Maiu nian.

Rozáriu atu proteje Kreda husi diabu nia atake sira

Nune’e, liuhusi mensajen sira ne’e, Papa Francisco hafoun ninia konvite atu reza Rozáriu, ho maneira partikulár, nia halo ona iha Outubru liubá, fulan marianu seluk, iha momentu difisil ne’ebé komunidade sarani moris, atu nune’e, “hadook atake sira ne’ebé hakarak fahe Kreda”.

“Ne’e mak oras atu defende Kreda” husi Akuzadór Boot ho orasaun, nia hateten iha 27 Outubru iha ninia diskursu enserramentu Sínodu Bispu sira-nian dedika ba foin-sa’e sira, hodi propoin orasaun Rozáriu loroloron.

Maria lori Jezús ba mundu

“Na’i-Feto hakarak mós lori mai ira, mai ita hotu, prezente boot katak Jezús; no ho Nia nia lori mai ita ninia domin, ninia dame no ninia ksolok. Nune’e Kreda hanesan Maria: Kreda la’ós loja ida, la’ós mós ajénsia umanitária ida; Kreda la’ós NGO ida, maibé nia simu mandatu atu lori Kristu no ninia Evanjellu ba ema hotu; nia la lori nia an rasik – nia ki’ik, boot, forte ka frajil, Kreda lori Jezús no tenkesér hanesan Maria, bainhira vizita Isabel. Saida mak Maria lori ba nia: Jezús. Kreda lori Jezús: ne’e mak sentru Kreda nian, lori Jezús! Se, nu’udar ipóteze, akontese katak Kreda la loris Jezús, nia mak Kreda mate ida! Kreda tenke lori Jezús nia karidade, Jezús nia domin, Kezús nia karidade (Audiénsia Jerál, 23 Outubru 2013).

Rozáriu, orasaun ha’u-nia fuan nian

Maria lori Na’i, tanba ne’e – Papa Francisco subliña – “Na’i-Feto la’ós opsaun ida: nia tenke hetan simun iha moris”. Rozáriu – nia hatutan – “mak sínteze Divina mizerikórdia nian”, orasaun ne’ebé nafatin akompaña ha’u-nia moris; nia mós mak orasaun ema simples no santu sira-nian. Nia mak orasaun ha’u-nia fuan nian”.