Venilale – Tuir programasaun Komunidade Edukativa Madre Mazzarello buka hakle’an Dokumentu Finál Sínodu Joven 2018 hodi buka implementa tuir realidade lokál. Atu realiza ida-ne’e, estudente sira, halibur hamutuk  ho Ir Jacinta Gusmão, loron 2 Maiu, atu aprezenta ho modu sintétiku parte sira dokumentu nian, hafoin, fó pergunta 3 tuir parte tolu Dokumentu nian: “Nia la’o ho sira; Sira-nia matan nakloke; Sira hamriik hodi bá kedas”.  Ida-idak ba iha nia grupu asosiasaun nian atu bele fahe sira nia hanoin kona-ba pergunta sira hanesan tuirmai-ne’e: Dezafiu ka problema saida de’it mak ó sei fahe ho Jezús atu nia bele tulun ó? Karakterístika saida de’it mak ó hanoin akompañadór/a ida tenke iha? Nu’udar joven, sá loos misaun ne’ebé Maromak haraik ba ó?

Depoizde serbisu iha grupu, iha asembleia, porta-vós sira hato’o sira-nia resposta.

Dezafiu sira ne’ebé estudente sira identifika relasiona ho moris pesoál no moris relasionamentu interpesoál hanesan la fiar malu, konta ema seluk nia moris, la respeita malu no ema nia sasán, la hatene rona. Dezafiu relasionamentu seluk mak seksu livre ne’ebé lori mós ba abuzu seksuál no hahalok abortu. Aleinde ne’e sira mós preokupa ho sira-nia futuru, teknolojia dijitál, dame iha mundu, pobreza materiál no morál, hadook an husi Igreja.

Kona-ba karakterístika akompañadór/a sira husu atu sai ema matan-moris, hatene rona, iha onestidade no ko’alia lia-loos, responsavel, komprende joven nia situasaun, pasiénsia, fó korajen no motivasaun, iha karidade, fó formasaun, buka fó solusaun ba problema maibé mós tulun sira sai protagonista.

Joven nia misaun mak uluknanai realiza sira-nia ideál moris nian liuhusi sai ema badinas atu estuda, nune’e bele sai protagonista iha moris rasik no iha sosiedade. Aleinde ne’e, joven presiza barani moris tuir valór no haklaken fiar, barani dehan “sin” ba buat di’ak no dehan “lae” ba buat aat, dada ho ezemplu maluk sira ne’ebé dook husi Maromak.

Enkontru tuirmai sei hakle’an Ezortasaun Apostólika pós-sinodál “Christus Vivit”.