Dili – Iha loron 25 Abril loraik, iha Komundade São José, Novisiado Komoro-Dili, halibur hamutuk Irmán FMA sira, Novisa sira no Kolaboradores hasae orasaun hahi no gratidaun nian ba Maromak ba Madre geral nia prezensa iha Instituto, hodi halo lectio hamutuk, iha lectio ne’e sira reflete kona ba pasajem Evanjellu Mt 25,40 “Wainhira imi halo buat ne’e ba Hau nia alin kiik sira ne’e ida, imi halo mai Hau rasik”. Lia fuan ne’e hakarak dehan, “se Jesus rasik moris hanesan kategoria ne’ebe  temi iha pasajen ida  ne’e, bainhira ita simu ema kiak sira ne’e ida, ita simu Jesus rasik. Ema kiak sira, sira hotu ne’ebe ema hakribi , sira ne’e sai Jesus Kristu Nia Sakramentu tamba Nia rasik hakarak identifika Ninia-An ho sira. Nia ne’ebe Liurai hatudu-An iha sira ne’ebe kiik”. Nia hadomi liu sira iha situasaun desvantajen nian, tanne’e ita mos aprende hadomi sira. Basá Nia hein ita nia domin no atensaun iha ema sira ne’e.

Loron tuir mai 26 Abril mak loron festa lolos, iha dader Irman sira hasae orasaun agradese nian liu husi orasaun dader nian no Misa hamutuk ho foinsae sira no Irman sira husi Komunidade Divina Providensia.

Iha tuku 20:00 pm, komunidade rua hamutuk ho Irman Juniores sira ne’ebe halo hela sira enkontro ho Me. Alma, foinsae sira husi Divina Providénsia kompartilha ami nia ksolok gratidaun nian ba Madre Geral, liu husi Jogos husi foin sae sira, kanta no dansa husi Irman Juniores sira no ikus drama badak no dansa husi Irman no Novisa sira. Ba Madre geral nia festa agradesemento, irman sira iha Amerika hili lia fuan sira ne’ebe NainFeto hato’o ba Madre Mazzarello: “ Hau entrega sira ba ó”. Maria halibur no tau matan ba Ninia oan sira no entrega misaun ne’e ba Maria Mazzarello. Ho liafuan hirak ne’e Mari hakarak saran iha Maria Mazzarello nia liman Ninia Oan Jesus ne’ebe prezente iha sira ne’ebe kiik no kiak.

Hafoin Me. Alma fo buona notte ba hotu. Iha buona notte ne’e Me. Alma dehan: “ohin hau rona lia fuan agradese repete bebeik. Los duni ita agradese ba Maromak. Iha kongregasaun balun sira komprimenta malu ho lia fuan “gratia Deo”, DB lakohi ita nia instituto uza lia fuan ne’e. Nia hakarak ita nia agradesemento ba Maromak liu husi ita nia asaun kiik sira ne’ebe ita fahe ba malu iha moris loro-loron. Hanoin fali ba ita nia loron tomak, ita nia liafuan sira no hahalok sira ne’ebe mak ita halo ona nu’udar aktu gratidaun nian ba Madre Geral. Depois buona notte, taka ho ice cream no ida-idak fila fali ba nia fatin. Obrigada barak.

(By Sr. Noemia no Nov. Ingracia)