Laga – Ho sintonia ho Irmán maluk sira iha Bellflower–California USA, husi komunidade Laura Vicuña Laga hamutuk ho orfaun sira, FMA no Komunidade Edukativa sira, hakarak hato’o ami nia eko gratidaun nian ba Madre Yvonne Reungoat, FMA., ne’ebé dedika nia an ba animasaun Institutu nian iha mundu tomak. Iha loron 22 Abríl, membru komunidade Edukativa halibur hamutuk atu reza vésperas no halo Lectio Divina ne’ebé prepara ona husi Inspetoria. Liuhusi empeñu ne’ebé husu liuhusi sharing, sira barak dehan atu fokus ami nia empeñu ba orfaun kiak sira ne’ebé entrega mai ami hodi ba vizita sira nia família ida-idak liuliu sira ne’ebé kiak no nesesidade ba asistensia nian. Empeñu ne’e la’ós buat foun maibé la’o ho sintonia ho ami nia projetu komunidade tinan ida ne’e nian; ne’ebé ami hahú ona ba vizita família sira ne’ebé bele dehan “mizeravel” espirituál no materiál.

Liahun ka eko agradesimentu nian ida ne’e hetan ninia beleza liuhusi Misa Agradesimentu iha 26 Abríl, ohin dadeer. Iha omelia Pe. Aquilles dehan liafuan OBRIGADA mak liafuan majiku ne’ebé ita bele hasa’e ba Madre Jeral, Madre Yvonne Reungoat, tanba ninia kna’ar ne’ebé nia halo atu anima Institutu liuliu tau matan ba Institutu nia misaun iha mundu tomak. Amu Selebrante mos tenik tan hodi dehan ba orfaun sira katak dalan konkretu atu agradese Madre Jeral mak liuhusi madre sira iha komunidade ne’ebé tau matan ba sira nia nesesidade tomak. Ita la presiza fó materiál ka osan mean no mutin atu agradese ema maibé basta ho liafuan “OBRIGADA” ne’e to’o ona atu hatudu ita nia gratidaun ba ema nia hahalok di’ak ne’ebé hatudu mai ita.

Festa ida ne’e taka ho orasaun rozáriu nian iha lokraik no kua dosi ne’ebé prepara ona hodi selebra madre Jeral nia festa.  Grazie carissima Madre Yvonne!

(Angel fma)