Parabéns Ir Tânia ba tinan 25 fidelidade iha vida konsagrada FMA

Venilale – Loron 24 Janeiru mak loron ida espesiál ba Família Saleziana, tanba loron ne’e ita selebra festa Pdroeiru S. Francisco de Sales. Don Bosco hili nia nu’udar modelu laran-di’ak/bondade nian aleinde ninia laran-manas apostóliku. Husi ninia naran “Sales” mak mai naran salezianu.

Aleinde festa Padroeiru nian, ohin loron ne’e mak loron festa ba irmán Tânia Aparecida Monteiro FMA, husi Brasil no misionária iha Timor-Leste husi tinan 2010, basá loron ne’e nia halo tinan 25 nu’udar FMA.

Oan dalimak husi maun-alin na’in 12, ninia vokasaun hahú nu’udar kuriozidade de’it, maibé depois Maromak kaer metin nia, dada nia hodi halo nia deside atu fó nia an ba nafatin ba Maromak.

Selebrasaun tinan 25 profisaun nian, halo iha Venilale, iha ne’ebé irmán Tânia servisu nu’udar animadora komunidade Maria Auxiliadora, uma formasaun ba pre-aspirante no tau matan ba orfanatu S. Domingos Sávio. Selebrante iha Eukaristia mak P. Avelino, neo-pároku parókia Sagrado Coração de Jesus. Iha ninia omilia, p. Avelino resalta eventu rua signifikativu ohin nian: Festa S. Francisco de Sales no Agradesimentu vokasaun irmán Tânia nian.  S. Francisco de Sales husik domin manán nia no nakonu ho domin, nu’udar bispu Ginevra no Annecy nian manán sarani 25.000 ne’ebé halai husi Kreda Katólika ba fali protestante atu filafali ba Kreda Katólika. Konvite ba ita hotu atu sai ema ne’ebé hatene husik domin mak prevale iha ita-nia moris.

Hafoin padre Avelino mós agradese irmán misionária sira ne’ebé tinan 25 liubá lori kongregasaun FMA mai iha rai Venilale no oras-ne’e nia fuan sai barak. Fuan sira-ne’e mak vokasaun rai-na’in sira no mós vokasaun misionária foun. Nia mós agradese irmán Tânia tanba fó nia moris ba Maromak hodi buka salva foin-sa’e sira. Salezianu/a sira serví Kreda hodi serví foin-sa’e sira.

Iha okaziaun ne’e irmán Tânia nakonu ho emosaun, durante Eukaristia agradese ninia inan-aman sira ne’ebé halo nia buras iha fiar sarani no iha orientasaun hilin vokasaun nian, ba formadora sira, superiora sira. Nia mós agradese salezianu sira ne’ebé prezente iha ninia moris liuhusi fraternidade no orientasaun espirituál. Agradesimentu ba mós FMA sira, ho modu espesiál ba Inspetoria TIN liuhusi irmán Paola nu’udar Inspetora ne’ebé simu nia ho ksolok no laran-luak hodi halo nia sente iha uma rasik. “Ha’u bele dehan ba ita, irmán Paola, katak ita hatene dada ha’u liuhusi ita-nia dedikasuan, simplisidade, Fortaleza maski ita ki’ik-oan no tanba domin boot ba misaun. To’o iha ne’e ha’u la sente todan atu mai iha fatin sei deskoñesidu iha tempu ne’ebá. Konserteza difikuldade sira la kuran, dezafiu sira, maibé mós oportunidade barak atu moris ho koerénsia ha’u-nia misaun”, irmán Tânia hateten.

Irmán Paola mós agradese irmán Tânia, fó korajen no parabéns ba ninia fidelidade to’o ohin. “Maromak haree katak ó disponivel nafatin nune’e mak Nia kontinua fiar ó hodi ikusmai bolu ó mai halo esperiénsia misionária iha Timor-Leste”.

Prezente iha festa alunu sira husi eskola ensinu básico Católiko, ETP Madre Mazzarello, mestre ruma, irmán FMA husi komunidade sira no formanda hotu.

Festa remata ho almosu hamutuk iha orfanatu S. Domingos Sávio, ho knananuk, dansa no teatru husi formande sira no husi labarik sira orfanatu nian.