Papa Francisco nia katekeze – 22 Janeiru 2014

RV – Insisiativa espirituál folin boot liu ne’ebé envolve komunidade sarani sira durante tinan 20 resin nia laran mak “Semana Orasaun nian ba unidade sarani sira nian”. Semana orasaun nian hahú husi loron 18 Janeiru no remata iha loron 25, festa Konversaun S. Paulo apóstolu nian. Amu-Papa fó hanoin kona-ba ne’e hodi refere nu’udar “tempu dedika ba orasaun ba unidade batizadu sira hotu”, hanesan Kristu nia liafuan sira: “atu sira sai ida de’it”. Tema tinan ne’e nian foti husi S. Paulo nia pergunta ba sarani sira Corinto nian: “Karik Kristu haketak an ba baluk sira?”, ne’ebé grupu husi Canada mak prepara.

Asesu Katekeze ho lia-portugés

“Konserteza Kristu nia an la fahe ba baluk sira. Maibé ita tenke rekoñese ho sinseridade katak ita-nia komunidade sira kontinua moris divizaun ne’ebé sai eskándalu, Divizaun entre ita sarani sira mak eskándalu ida! La iha liafuan seluk: eskándalu ida!”.

Amu-Papa fó hanoin  katak “Kristu nia naran kria komuñaun, la’os divizaun! Nia mai atu halo komuñaun entre ita, la’ós atu fahe ita. Batizmu no Krús mak elementu sentrál dixipuladu kristaun ne’ebé komún ba ita hotu. Divizaun sira fali halo sai fraku kredibilidade no efikásia ba ita-nia empeñu evanjelizasaun nian no iha risku atu hamamuk Krús no ninia kbiit” .

Hodi konvida ema sarani sira atu banati tuir apóstolu Paulo nia atitude ne’ebé “rekoñese ho ksolok Maromak nia don sira prezente iha komunidade”, nia husu atu ita “haksolok iha sinseridade ba grasa sira Maromak haraik ba sarani seluk”, buat ruma ne’eb´eita presiza no bele simu husi ita-nia maun-alin sira nu’udar don ida.

Papa Francisco taka hodi husu komunidade sarani sira  atu hasoru malu atu bele komprende buat sá mak hotu-hotu bele simu husi maun-alin sira. Atu halo ida-ne’e ita presiza “orasaun barak, haraik-an, husu reflesaun no konversaun kontínua. Ita la’o bá oin tuir lurón ida-ne’e, hodi harohan ba unidade sarani sira-nian, atu eskándalu ida-ne’e remata no la eziste tan entre ita”.