Dili – Provinsiál SDB, Pe. Apolinário Neto SDB, konvoka konselleiru/a provinsiál SDB no FMA ba enkontru konjunta atu trata asuntu ruma iha loron 3 Abríl 2018, hala’o iha Centro João Paulo II, Comoro.

Ajenda ba enkontru dahuluk ne’e kona-ba oinsá Kongregasaun naan no feton ne’e nia prezensa iha Timor-Leste.

Uluknanai membru ida-idak aprezenta nia an no knaar sira hala’o iha Provínsia. Husi SDB sira iha Pe. Apolinário, provinsiál, P. Manuel Pinto. Pe. José de Sá, Pe. Acácio, Pe. João Boavida, no Irmaun Adriano. Husi FMA nia parte iha Ir Alma, provinsiál, Ir Sebastiana, Ir Veronika Kusnadi, Ir Júlia, Ir Esmeralda, Ir Evangelina, Ir Maria Carmen no Ir Jacinta Gusmão.

Iha orden loron nian iha tema “animasaun iha Família Saleziana”. Eventu ida atu selebra iha loron 18 Outubru mak Loron Família Saleziana hamutuk ho Pe Vaclac Klement SDB (Konselleiru rejionál Ázia-Pasífiku) no Ir Maria Luisa Miranda FMA (Konselleira Ámbitu Família Saleziana). Iha enkontru ne’e sei husu atu estrutura sira husi Família Saleziana oioin prezente iha Timor-Leste bele mai partisipa hodi iha mós formasaun ho tema “Santidade iha Família Saleziana Mundiál no Santidade iha Família Saleziana Rejionál”.

Enkontru nia laran trata mós asuntu seluk hanesan animasaun iha Família Saleziana husi parte SDB no FMA. Jeralmente kongregasaun FMA mak fó formasaun ba grupu seluk no SDB amlulik sira serví iha parte sakramentu nian liuliu Eukaristia no Konfisaun.

Iha diskusaun emerje katak dalabarak Família seluk sei sai dependente no sai fali ita-nia destinatáriu, envezde kolabora hamutuk ba misaun ida de’it katak, edukasaun ba foin-sa’e sira. Aleinde ne’e, iha sujestaun atu halo planu hamutuk atu hodi tau objetivu komún no la’o hamutuk tuir ida-idak nia misaun espesífika.

Kona-ba formasaun ba grupu seluk, Ir Alma husu atu hametin sira-nia identidade, nune’e bele hariku liután ho sira-nia espesífiku, hodi la sai membru Família Saleziana enjerál de’it.

Ko’alia kona-ba relasaun SDB-FMA, bele dehan katak iha relasaun fraternidade boot, SDB sira sempre disponivel ba asisténsia espirituál, liuliu sakramentu sira. Iha serbisu pastorál bele dehan katak FMA sira laran-manas, marka prezensa iha eskola SDB nian ka iha parókia hodi nune’e hatudu ita-nia prezensa karizmátika no envolve foin-sa’e sira. Serbisu animasaun MJS mós bele dehan katak FMA sira nia prezensa sempre konstante liuliu iha anima no fó formasaun ba foin-sa’e sira tuir zona. FMA sira mós husu ita serbisu hamutuk mós ba animasaun vokasionál.

Ikusmai fó sai mós sujestaun ruma, atu tau Reitór-Mor nia estreia tinan-tinan nu’udar baze ba planu hamutuk ita-nia serbisu ba foin-sa’e sira. Defaktu husi “Konsulta Família Saleziana” iha ona planu atu tinan-tinan membru rua husi Família Saleziana sei tuir “Giornate della Famiglia Salesiana” iha Roma (Itália) hodi mai fahe fali ba membru sira seluk iha loron Famílai Salezian ba Timor-LEste, katak iha festa S. Callisto Caravario nia loron litúrjiku.

SDB sira hakarak atu promove santidade saleziana iha parókia saleziana sira, nune’e husu atu ita selebra mós Madre Mazzarello iha parókia. Kona-na loron festa, variavel, tanba festa loloos mak iha loron 13 Maiu, maibé tan iha Timor iha devosaun ba Na’i-Feto Fátima, sei hala’o iha loron 9, loron Maria Mazzarello nia moris ka loron ida sábadu nian besik ba loron 9.

Enkontru taka ho informasuan seluk kona-ba ajenda sira retiru anuál no kapítulu provinsiál sira, SDB nian ne’ebé  liu ona no FMA nian ne’ebé sei hala’o iha fulan Outubru.